Ğıyraqnıñ tönyäğında boralaq qazağa yulığıp Quşma Ştatlarnıñ ike ğaskärie ülgän. Xärbi citäkçelek belderüençä, qaza bulğan cirdä xärbi çaralar ütkärelmägän. Qaza säbäpläre tikşerelä. Aldaraq, düşämbe irtän Ğıyraqnıñ könbatışındağı Anbar wilayätendä bulğan bäreleştä koalitsiäneñ 3 ğaskärie ülüe xäbär itelgän ide.
Ğıyraq xakimiatläre ilneñ elekke başlığı Säddäm Xösäyengä mäxkämä qararı çığarılır aldınnan kertelgän iminlek çaraların beterä başladı. Ğıyraq başqalasında häm sönnilär yäşägän ike wilayattä maşínalar yörüe älegä sişämbegä qädär tıyılğan. Cäyäwlelär isä bügennän ük bernindi qarşılıqsız yöri ala.
Şiğıylar wilayatlärendä Xösäyenne ülem cäzasına xökem itüne şatlanıp qarşı aldılar. Könbatış illär isä, bu qararnı törleçä qabul itte. Quşma Ştatlar prezidentı George Bush qararnı xuplap, mäxkämä eşe tögällänüne Ğıyraq demokratiaseneñ yuğarı uñışı, dip atadı. Finlyändiä, Fransia, İtalia häm İspania başlıqları ülem cäzasına qarşı ikänleklären belderep, Ğıyraq xakimiatlären qararnı tormışqa aşırmasqa çaqırdı.
