Accessibility links

Udmurtiädä berençe televizion tapşıruınıñ efirğa çığuına 50 yıl tuldı


Bu data qup närsä turında söyli. İñ berençe çiratta, bu Udmurtiädä yañalıqqa omtılışnı, ayıruça, injener—texnik fikerläweneñ üseşen kürsätä. Respublikanıñ berniçä sänäğät predpriätieläreneñ teläktäşlek belderüe näticäsendä 1956 yılda Udmurtiä üzeneñ telestudiäsen açuğa ireşä. Äytergä kiräk, berençe televizion apparaturalar respublika zavodlarında eşlänä. Xätta berençe videokameranıñ da Votkinsk zavodında eşlänüe bilgele. Zavodnıñ bügenge xezmätkärläre bu xäbärne ğäcäplänep qabul itälär. İjawda açılğan televizion üzäk Rossiädä tuğızınçı bulsa, ä avtonomiä respublikaları arasında ul berençe bulıp eşen başlıy.

Berençe könnän başlap telestudiädä bezneñ millättäşlärebez dä xezmät itä. Udmurtiä respublikasınıñ atqazanğan sänğät eşleklese, rässam İl'yas Nurmöxämmätov studiägä eşkä alınğan berençe törkem xezmätkärlär arasında. Rässam studiäne efirğa äzerli. Berençe yıllarda tapşırular barı tik turı efirda ğına alıp barıla. İl'yas Nurmöxämmätovnıñ kartinaları äle bügen dä telestudiäneñ bülmälären bizi. Bügen İl'yas Nurmöxämmätovnıñ eşen Rozaliä Şäfeeva däwam itä.

Teleoperator Rawil Aitov respublikanıñ qaysı ğına töbägendä bulmağan, nindi genä waqiğalarda qatnaşmağan, anıñ operator küzlegennän nindi genä qızıqlı xällär turında söylänmägän. Rawil Aitov töşergän küp kenä programmalar küptapqırlar konkurslarda ciñü yawlağan. Operator Lenar Kadıyrov iseme dä tamaşaçığa tanış. Ul Udmurtiä televideniesendä täcribä alıp, xätta üzäk televideniedä härkemgä tanış «Pole çudes» tapşıruların töşerüdä dä qatnaşqan şäxes. Operatorlar ikese dä tatar telendäge «Xәerle kiç» tapşıruların efirğa äzerläwdä küp tırışlıq kürsättelär. 73 yılda xäbärlär redaksiäsenä tağın ber millättäşebez eşkä qabul itelä. Ul — Zaquan Nuretdinov.

Televidineniädä ul yıllarda küp tapşırular turı efirda alıp barıla. Xezmätkärlär respublika buylap xäbärlär cıyıp yörsä dä, ul videokameralarnı bügenge zaman texnikası belen çağıştırıp bulmıy, älbättä, dip iskä aldı Zaquan Nuretdinov. Yış qına tasmada bernindi surät tä kilep çıqmıy ide, dip urtaqlaştı Zaquan Nuretdinov.

Şundıy kimçeleklärne buldırmas öçen operator belän berrättän fotograf ta töşerep barğan. Kinotasma kilep çıqmasa — xäbärlärne fotosurätlär belän dälillärgä turı kilgän. Telestudiädä qup yıllar fotograf wazifasın millättäşebez Xäbir Usmanov başqarğan. Soñraq ul «Yañarış» gazetasında da berniçä yıl eşläde.

Zaquan Nuretdinov ul yıllarda redaksiä eşen tikşerep torğan tağın ber närsä turında isenä töşerde. Bu— senzura xezmätkärläreneñ yazılğan materiallarnı uqıp, alarnı tikşerep efirğa çığaruçılar. Zavodlarnı ataw tıyılğan häm başqalar.

Udmurtiä televideniesendä eşläw Başqortstannan kilep urnaşqan Zaquan Nuretdinovqa respublika belän tiz arada tanışu, jurnalistika hönären kamilläşterüdä yärdäm itä. Bügen televidenie studiäläre berniçä. Ul anda eşläwçe millättäşlärebez öçen söyenep tora.

Şulay itep respublikada televidеniä jurnalistikası üseşendä millättäşlärebezneñ öleşe bar. TVneñ bügenge programmalarındağı tatar tapşıruları aña milli rux birä.

XS
SM
MD
LG