Bötendönya Tatar kongressı Başqarma komitetı äğzası, Başqortstan Tatar milli-mädäni moxtariäte räise Ramil Bignov citäkçelegendäge wäkillek Qazanğa eş säfärenä kitte. Anda Başqortstan tatarları Bötendönya Tatar kongressı Başqarma komitetı utırışında häm Federal' tatar milli-mädäni moxtariäte idäräse kiñäşmäse eşendä qatnaşa. Qazanğa kitär aldınnan, bez Başqortstandağı tatar milli oyışmaları eşçänlegen kileşterüçe wazıyfasın ütäwçe Ramil Bignov belän küreştek häm aña berniçä soraw belän möräcäğät ittek.
Ramil äfände äytüençä, Bötendönya Tatar kongressı Başqarma komitetı, ğomumän alğanda, baytaq qına eşlär başqardı häm başqara. Törle töbäklärgä barıp küçmä utırışlar ütkärü dä üz näticäsen birä. Ämma Ramil Bignov äytüençä, Başqortstan tatarları häm alarnıñ milli oyışmaları respublikadağı üzençälekle şartlarda eşli häm şuña da alarğa ayırım ber mönäsäbät häm yärdäm kiräk. Läkin bu teläktäşlek härwaqıtta da bulmıy, di Ramil äfände.
“Bezneñ öçen iñ berençe çiratta tel statusı mäsäläsen xäl itü tora. Bu mäs'älädä BTK da yärdäm itärgä tieş. Bez Mortaza Räximovqa da, Mintimer Şäymievkä dä, V. Putinğa da möräcäğätlär äzerlädek. Ämma faydası bulmadı. Bez bu yunäleştä eşne däwam itäçäkbez”, – di ul.
Ramil Bignov süzlärençä, Qazandağı fiker alışular ezsez qalmasqa tieş. Anda Federal' Tatar milli-mädäni moxtariäte idäräseneñ dä kiñäşmäse ütä. Şul söyläşügä dä zur ömetlär bağlawın äytä Ramil äfände. “Bezgä federal' Tatar milli-mädäni moxtariätneñ däräcäsen, abruyın bar Rusiä külämendä kütärergä kiräk, - dip isäpli ul. – Şulay bulğanda ğına ildä xalıq sanı buyınça ikençe urında bulğan tatar xalqı belän isäpläşerlär häm bezneñ küp kenä milli-mädäni mänfägat'lärebezne xäl itügä yul açarlar”.
