Mäğlüm bulğança, ağımdağı közdä Sverdlovski ölkä Dumasına bulıp uzğan saylawlardan soñ, ölkädäge tatar deputatları sanı arttı. Bügenge köndä Sverdlovski ölkäse Zakonnar Cıyılışında dürt, Yekaterinburg şähär Dumasında biş tatar deputatı eşli.
Elegräk tarixta kürelmägän bu xäl ölkädä yäşäwçe tatar xalqınıñ milli mänfägat'lären qayğırtunı entuziazm däräcäsennän xakimiät däräcäsenä kütärep bulır digän uylar tudıra. Älege mömkinçelekne faydalana başlaw niäte belän, Yekaterinburg şähärendä eşläp kilgän Milli media-xoldingnı ğämälgä quyuçı tatar yegetläre, bügenge köndä ölkä Zakonnar Cıyılışı deputatları bulıp saylanğan Rinat Sadriev häm Al'bert Abzalov, barlıq tatar deputatların cıyıp, utırış uzdıru başlanğıçı belän çıqtılar.
Bu könnärdä Yekaterinburg şähäreneñ xalıq telenä “Aq yort” (“Belıy dom”) dip kergän xökümät yortı binasında Sverdlovski ölkä häm Yekaterinburg şähär dumasına saylanğan tatar deputatları kiñäşmäse bulıp uzdı.
Ölkä Duması räise urınbasarı Nail äfände Şäymärdanov, kiñäşmä başlanır aldınnan, bu yortta deputatlarnıñ milli bilge buyınça cıyıluınıñ tarixta berençe tapqır buluın iskärtep ütte. Bez berkemne dä milläte buyınça ayırırğa tieş tügel, digänräk fiker dä yañğıradı.
Ämma deputat Rinat Sadriev, xalıq ışanıp saylağan tatar deputatlarınıñ qayber milli mäs’älälärne xäl itärgä cıyılışuında bernindi yaraqsız xäl kürmäwen äytte. Bigräk tä bügen bezneñ bergäläp xäl itäse mäs'älälär küp, dide ul.
Kiñäşmä waqıtında Sverdlovski ölkäse tatarlarınıñ milli tormışındağı aktual' mäs’älälärne xäl itü yulları turında söyläşü alıp barıldı. Şulay uq 1-2 dekaberdä Yekaterinburg şähärendä bulıp uzaçaq “”Berdäm Rossiä” säyäsi partiäse syezdında qatnaşu öçen Tatarstan respublikasınnan zur däräcäle delegatsiä kilüe uñayınnan uzdırılaçaq waqiğalar turında fiker alışu buldı.
Bügenge köndä küp tatarlarnı borçığan mäs'älä – “Tatarstan-Yaña ğasır” sputnik televideniese tapşırularınıñ Yekaterinburg teleekrannarınnan yuqqa çığuı. Tabış artınnan quuçı kabel' televideniese çeltärläre başlıqları, TNV signalın tamaşaçığa citkerü öçen xalıqtan cıyğan aqçağa ğına riza bulmıyça, monıñ öçen bezgä xökümät yäisä Tatarstan aqça tüläsen digän süz belän, 100 meñgä yaqın tatar xalqı yäşägän ölkä üzägendä TNV signalın birüne tuqtattılar. Yekaterinburg şähär Duması deputatları, bu mäs’äläne inde öyränülären äytep, bernindi byudjettan da eşquarlar ixtıäcın qaplaw öçen aqça birü mömkin tügellegen belderdelär. Ämma deputat Nail Şäymärdänov bu eştä şähär xakimiäte säyäsäte belän kileşmäwen äytte. Anıñ fikerençä, xakimiät kabel' televideniese citäkçelärenä berär yoğıntı yasıy alır ide. Ä deputat Sadriev fikerençä, bu mäs’äläne çişüneñ başqa yulların ezlärgä kiräk.
Ölkä televideniese üz tapşıruların retranslyatorlar aşa böten ölkägä tarata. Texnik yaqtan andıy mömkinçelekne dä öyränep, bälki Tatarstan signalın retranslyatorlar arqılı efirğa çığarıp bulır? Ul waqıtta barlıq tatar awıllarında yäşäwçelär dä Tatarstan tapşıyruların klublarda yäisä mäktäplärdä genä tügel, öylärendä qarıy alır ide.
Kiñäşmä waqıtında moña qädär kübräk iğänäçelär qaplıy torğan Ölkä Sabantuyı çığımnarın byudjet tarafınnan finanslaw mömkinçelekläre, Sverdlovski ölkäsendä Federal' sabantuy uzdırıp qaraw täqdime turında fiker alışu bulıp uzdı. Şulay uq küp sanlı tatar milli oyışmalarınıñ tarqawlığı, berläşep eşli almawı da deputatlarnı borçıy bulıp çıqtı.
Deputatlar barlıq borçığan mäs’älälärne urtağa salıp söyläştelär. “Berdäm Rossiä” syezdı könnärendä Yekaterinburgka Tatarstan respublikası prezidentı Mintimer Şäymiev häm başqa däräcäle qunaqlar kilü uñayınnan, yaqın kiläçäktä Tatarstannıñ Uraldağı daimi wäkile Rawil Bikbov qatnaşında tağın ber kiñäşmä cıyarğa süz quyışıp taralıştılar.
Fäviä Safiullina,Yekaterinburg
