Accessibility links

Кайнар хәбәр

13 noyäber - Xalıqara suqırlar köne


Xalıqara suqırlar köne turında suqır keşe üze söylärgä älläni aşqınıp tormıy. Suqırlar köne, şunnan närsä? Yılda bit 365 kön häm här könne bu keşelär yäşäw öçen köräşä, buldıra alğança yäşi. Ä bu keşelär çınlıqta bik küp närsägä sälätle. Alar köçle häm ixlas, märxämätle häm añlawçı, belemle häm faydalı bula ala. Äye, aqılsız häm miherbansız bezneñ cämğiät öçen alar fayda kiterä ala.

Tatarstanda 10 meñgä yaqın suqır keşe yäşi. Alarnıñ ike meñe - balalar. Şuşı keşelärneñ tormışın ciñeläytü öçen nindi şartlar bar, ä nindilär yuq? Şuşı xaqta Tatarstannıñ suqırlar kitapxanäse citäkçese Nail Säfärgaliev söyli:

Bilgele, suqır keşegä yulnı uzuı bik awır. Monıñ öçen çit illärdä tawışlı svetoforlar bar. Xäyer, alar Qazanda da bar. Ämma bik az. Başqa keşelär isä yulnı tiz genä yögerep uza, ä suqır keşegä iğtibar birmi. Bu berençedän. İkençe möhim mäs'älä - suqır keşelär tıñlıy torğan kitaplarnıñ citmäwe. Yaña çıqqan 122 qarar buyınça älege tıñlaw caylanmaları belän suqırlarnı Rusiä xökemäte tä'min itärgä tieş. Monıñ öçen reabilitatsiä turındağı şäxsi qartanıñ buluı şart. Ämma xäzer dä birelgän magnitofonnar bik az. Älege qanun bik naçar eşli dip äytergä bula.

Tatarstanda suqırlar oyışması eşläp kilä. Ul monnan 85 yıl elek barlıqqa kilgän. Rusiä külämendä berençe bulıp. Şuşı oyışma Tatarstandağı biş şirkät belän xezmättäşlek itä: alar Qazan, Älmät, Alabuğa, Çistay, Bögelmä şähärlärendä urnaşqan. Häm älege şirkätlärdä meñgä yaqın suqır keşe xezmät kürsätä ide. Ämma soñğı yıllarda şirkätlärneñ eşçänlege sülpänäyde. Bik küp keşe eşsez qaldı. Sälämät keşe öçen eşsez qalu bik awır toyıla. Ä suqır keşe öçen eşneñ buluı tağı da möhim. Şuşı könüzäk mäs'älä xaqında Tatarstannıñ atqazanğan artistı, cırçı häm muzıkant Zakir Şahban söyli:

Suqırlarğa eş birergä kiräk. Ayaq-qulları isän, alar bit eşli ala. Elek bu mäs'älädä bezneñ respublika alğa kitkän ide. Xezmät bülägen dä alıp, böten Rusiägä tanılğan ide. Suqırlarnı yañadan eş belän tä'min itü mäs’äläsen däwlät tarafınnan xäl itärgä kiräk. Ä bäyräm turında äytkändä, belmim bu könne bäyräm dip atap bula mikän? Şulay da böten ildä bilgelänep ütelgäç, min dä barlıq suqır keşelärne, naçar kürüçelärne täbrik itäm! Alarğa isänlek-sälämätlek, sabırlıq telim! Optimizmnı yuğaltmıyça yäşärgä, yäşärgä häm yäşärgä!

Al'bina Zäynulla

XS
SM
MD
LG