Accessibility links

Кайнар хәбәр

Bala töşerüne tıyu demografiäne yaxşırtaçaqmı?


20 noyäber - Xalıqara balalarnıñ xoquqların yaqlaw köne. Rusiädäge bik kisken demografik wäzğıätne yaxşırtu öçen soñğı aralarda qayber çaralar kürelä başladı. Xäyer, ata-analar häm inde balalar alarnı yaña yıldan ğına sizä başlar. Balağa yäş yarımğa qädär ay sayın 1,5 meñ sum, ä ikençe, öçençe balağa 3 meñ tülänäçäk dip wäğdä itälär. Şulay da ildäge demografik wäzğıätne yaxşırtu çaralarınıñ hämmäse dä fayda kitererme?

Rusiädäge demografik wäzğıät belän nıqlap şöğellänä başladılar. Balalarğa tüläwlärne arttıru bik yaxşı anısı. Xäyer, alarnıñ küläme dä balanı üsterügä bik citmäs şul. İkençe häm annan soñ tuğan balağa 250 meñ sum birü demografiädä berniqädär sizeler anısı. Ä monnan tış tağın ber çaranı uylap tapqannar. İldä bala töşerüne tıyarğa cıyınalar. Däwlät Dumasında älege mäs'älä inde berniçä tapqır qaraldı. Rusiädä ürçemäwneñ säbäben taptılar bit. Häm töp doşman - ğailä planlaştıru üzäkläre. Alar xatın-qızlarnı kötelmägän balağa uzudan saqlanırğa öyrätä häm bala töşerü turında da alar söyli. Bik ciñel labasa, xalıqnıñ xezmät xaqın arttırıp, sotsial' mömkinleklär tudırğançı, ğailä planlaştıru üzäklären yabarğa da quyarğa. Bala töşerüne tıyarğa. Häm xatın-qız qaya bara, bala taba da quya inde imeş. Däwlätkä xezmät itärgä yegetlär citmi, fabrika-zavodlarda eşçelärgä qıtlıq. Ä xatınnar bala tabarğa telämi, matur tormış turında xıyallana..

Tatarstan belgeçläre abortlarnı tıyuğa bik tiskäre qarıy. Döres, alar bala töşerüne propagandlau belän dä şöğellänmi. Soñğı berniçä yılda respublikada bala töşerü sanı şaqtıy kimegän. Sälämätlek saqlaw ministrlığınıñ bala tudıru bülege baş belgeçe Nailya Gaynanova äytüençä, bala töşerüne tıysalar kriminal' abortlar yäğni qaçıp qına öydä bala töşerü barıber bulaçaq. Ä mondıy abort küp oçraqta bik ayanıçlı näticälärgä kiterä:

Bügenge zamanada da kriminal' abortlar oçrap tora. Äle küptän tügel genä Çüpräle rayonında ber yäş kenä xanım ike balasın qaldırıp, kriminal' aborttan ülde. Bala töşerüne tıyğan oçraqta, öy şartlarındağı abortlar artaçaq. Monıñ näticäläre isä uñay bula almıy.

Xäyer, demografiäne mondıy ısullar belän yaxşırtırğa tırışu Rusiä öçen yañalıq tügel. 60нчы yıllarda ildä abortlarnı tıyu turındağı qarar çıqqan ide inde. Bala töşergän xanımnarnı ul waqıtta xätta törmälärgä dä yapqannar. Ämma bala töşergännär anda da. Öy şartlarında bulsa da. Näticädä qan yuğaltıp bik küp xatın-qız dönya quyğan. Baqsañ, bik küptän dä bulmadı bu xällär, küräseñ barıber onıtılğan.

Al'bina Zäynulla

XS
SM
MD
LG