Başqortstannan Rusiä Federatsiä şurasına saylanğan senator İğor İzmest'yev östendä bolıtlar quyıruı xaqında xäbär itkän idek inde. Soñğı könnärdä Başqortstannıñ räsmi matbuğatında anı qara töslärdä kürsätkän yazmalar şaqtıy basıldı. Alarnıñ qayberläre üzäk mäğlümat çaralarınnan küçerep birelde. Bu inde Başqortstan citäkçelege İzmest'yev äfändedän tizräk waz kiçärgä cıyına ikän digän farazlarnı nığıttı ğına.
Mäğlüm ki, İzmest'yev äfände 2003 yılda Başqortstan prezidentın saylawlarda üz kandidaturasın quyıp, soñınnan üz saylawçıların Mortaza Räximov öçen tawış birergä çaqırğan ide. Başqortstannıñ neft' kompleksında üz biznesı bulğan İğor İzmest'yev bik bay eşquar sanala. Başqortstan räsmi citäkçelege belän dä moñarçı dustanä mönäsäbättä buldı ul. Mortaza Räximovnıñ ulı Ural belän dä bik yaqın duslar bulğanlığı bilgele. Ämma wäzğıätlär üzgärep tora. İğor İzmest'yevnı törle gönahlarda, xätta yallap keşe üterüdä qatnaşı buluda ğäyeplilär. Senator üze törle matbuğat çaralarına birgän äñgämälärendä üzenä tağılğan ğäyeplärneñ uydırma buluın äytä.
Aldağı atnada, 30 noyäber könne Başqortstan parlamentı üz utırışında İzmest'yev äfändeneñ senatorlıq wäqälätlären tuqtatu mäsäläsen qarayaçaq. Anıñ uñay xäl iteläçägenä berkem dä şiklänmi. Mortaza Räximov üze dä moña fatıyxa birgän imeş. Härxäldä, respublika xakimiätläre quşqannı ğına yaza torğan räsmi matbuğatta da İzmest'yev äfändene qara surätlärdä kürsätkän yazmalar çığuı şuña citdi işarä.
