Başqortstannan xärbi xezmätkä çaqırılğan ber yegetneñ tereläy kümelüe turında xäbärlär bulğan ide. Aña qarağanda, yegetne ofitserları tuqmap tereläy kümep quyğan. Monı küzätep torğan ber qart çoqıp çığarıp yegetne azat itkän.
Respublikanıñ xärbi komissarı general-mayor Timofey Azarov monıñ yalğan buluı turında belderde. Anıñ süzlärenä qarağanda, Sergey Ovçinnikov dezertirlığı öçen cäzadan qaçarğa teläp monı uylap çığarğan. Komissar süzlärenä qarağanda, Sergey xärbi xezmätkä 2005нче yılnıñ 23нче iyünendä çaqırılğan bulğan. Yekaterinburg yanında xezmät itkändä ul berniçä tapqır añın yuğaltıp yağılğannan soñ ekspertizağa cibärelä. Ekspertiza anı sälämät dip taba. Xezmät itkän urınına qaytqaç ul tağı añın yuğaltıp yağıla. Aña yärdämgä taşlanğan ber mayor yegetneñ biten çäbäkläp añına kiterergä tırışqanda Ovçinnikov küzlären açıp cibärä häm monı üzeneñ tuqmaluı itep kürsätergä tırışa. 2006 yılnıñ 17 martında ul xezmät itkän urının qaldırıp kitä. Bu turıda Ovçinnikov çaqırılğan Ufanıñ Oktäber rayonı xärbi komissariatı häm yegetneñ ata-anasına xäbär itälär. Xäbär bulıp öç täwlek uzuğa xärbi çast'qa Ovçinnikovnıñ änise kilä. Ul ulımnı üterep urmanğa kümüegez dä mömkin dip belderä. Sergey Ovçinnikov isä Çiläbe ölkäseneñ Uvel' rayonı Suxorış awılında märmär taşlar eşkärtüçe bulıp eşkä urnaşa. Eşkä aluçılar “Şäxsi eş” isemle dokument açqanda anı fotosurätkä töşerälär. Xärbi prokuratura şunıñ yärdämendä Ovçinnikovnıñ ezenä töşä. Artaban yeget tuğan “oyasına” qaytıp änise belän şul uydırmanı uylap çığara häm xoquq yaqlawçılarğa 500 sum aqça tüläp ğariza yaza. General älege xällärne bäyän itkännän soñ Sergey Ovçinnikovnıñ Samarağa psixiatriä ekspertizağa cibärelüen dä belderde. Anıñ süzlärençä, yeget sälämät dip tabılsa, ul xökem iteläçäk.
