Accessibility links

Кайнар хәбәр

Başqortstanğa Rusiä belän Kileşü ni öçen kiräk?


Bu könnärdä Başqortstandağı başqort milli oyışmaları ber-ber artlı üz cıyınnarın ütkärä. Häm alarnıñ urtaq üzençälege şunda – alarnıñ kön tärtibenä ber töp tema kertelä. Ul da bulsa - Başqortstan belän Rusiä arasında wäqälätlärne üzara büleşü turında yaña Kileşü tözü mäsäläse. Älege mäs'älä tizdän Rusiä belän Tatarstan arasında yaña Kileşü tözelä ikän digän xäbärlär taralğannan soñ häm Rusiä Däwlät Duması räise urınbasarı Oleg Morozovnıñ belderüennän soñ quyırtıla başlağan ide. Mäğlüm buluınça, Oleg Morozov Rusiä belän Kileşüne Tatarstan belän Çeçnya ğına tözergä xoquqlı digän fikeren yañğıratqan ide. Anıñ bu fikere Başqortstan citäkçelegenä dä, başqort milli oyışmaları wäkillärenä dä oşamadı.



Tiz arada Başqortstanda “Federativ Rusiä öçen” digän oyışma tözelde, annan soñ uzğan atnada Başqort yäşläre berlege üzeneñ ğädättän tış qorıltayın ütkärep, anda Oleg Morozovnıñ tetmäsen tette. Başqort yäşläreneñ liderı sanalğan Artur İdelbaev Morozovnı “axmaq” dip atadı häm xätta Rusiägä qıyıqlatıp qına suğış belän dä yanadı.

Comğa könne Ufada “Ural” başqort xalıq üzäge dä üzeneñ kiñäytelgän kiñäşmäsen ütkärde. Anda rayonnardan da wäkillär kilgän ide. Rusiä Başqortstan belän dä Kileşüne motlaq tözergä tieş, digän taläplär yañğıradı bu cıyında. Kiçen isä “Federativ Rusiä öçen” digän oyışmanıñ da çirattağı utırışı bulıp ütte. Anda da şul uq mäs'älä quyırtıldı.

Şulay itep Başqortstannıñ cämäğätçelek oyışmaları, ayıruça başqort milli xäräkäte oyışmaları federal' üzäk belän Kileşü tözüne taläp itep, könnän-kön üz tawışların köçleräk yañğırata başladı. Küp kenä bäysez säyäsät belgeçläre äytüençä, mondıy ğämällärgä başqort milli oyışmaları üz beldege belän genä barmıy. Alar artında respublikanıñ räsmi dairäläre tora dip belderelä. Respublikadağı tanılğan etnosäyasät belgeçe İldar Gabdrafıykov ta şul fikerne alğa sörä.

“Başqortstanda Mäskäw belän ike arada yaña Kileşü tözü Başqortstan citäkçelege öçen abruynı saqlap qalu çarası bulıp tora, - di Ufadağı kiñ bilgele etnosäyasät belgeçe İldar Gabdrafıykov. – Ämma alar üzläre turıdan-turı il citäkçelegenä bu Kileşüne tözü taläbe belän çığarğa qılmıy. Bu eştä alar, härwaqıttağıça, ictimaği oyışmalarnı faydalana. Başqort milli oyışmalarınıñ soñğı könnärdä canlanıp kitüen şunıñ belän genä añlatıp bula”.

Aldağı könnärdä Başqortstannıñ başqa başqort milli oyışmalarınıñ da Rusiä belän yaña Kileşü tözüne taläp itep üz cıyınnarın ütkäräçäge mäğlüm. Kiläse şundıy cıyınnı “Aq tirmä” başqort klubı oyıştıra. Anda da bu tema kütäreläçäk ikän.

XS
SM
MD
LG