“Xizb ut-Taxrir Äl-İslam” törkemenä qarağan keşelär terrorlıq xezmätenä yärdäm itü, ekstremistik oyışma buldıru kebek cinayätlär qılğan dip farazlana. Şik astına alınuçılar Rusiä cinayätlär kodeksınıñ 205 häm 282 nçe maddälärenä nigezlänep qulğa alındı di Rusiä Federal' Qurqınıçsızlıq xezmäteneñ Tatarstandağı idäräse matbuğat üzäge citäkçese Eduard İsmäğıylev. Anıñ äytüenä qarağanda totqarlanuçılar arsında ber çit il watandaşı da bar. Ul moña qädär dä üz ilendä cawapqa tartılğan bula.
Xäzer bu şäxeslärgä qarata cinayät eşe açıla. Rossiä Yuğarı mäxkämäseneñ 2003 yılğı qararı nigezendä älege oyışmanıñ Rossiädäge eşçänlege bezneñ ildä tıyılğan. Ul 15 xalıqara terroristik oyışma isemlegenä kertelä. Federal qurqınıçsızlıq häm eçke eşlär xezmätkärläre totqarlanuçılarnıñ isemen älegä äytmi. Alar monı tikşerü eşlärenä qomaçawlarğa mömkin dip añlata. Şulay uq niçä keşe qulğa alınğanlığı da yäşerelä. Alarnıñ unnan artıq buluı ğına mäğlüm. Xoquq saqçıları alarnı totqarlağan öydä kitaplar, audio, video kassetalar,alğan. Xizb ut-Taxrir Äl-İslam oyışmasınıñ dini kitaplarında cinayätçel fikerlär barmı? Alarnıñ mäğnäse nidän ğibärät buluı xaqında da mäğlümat yuq.
“Xizb ut-Taxrir Äl-İslam” ğäräpçädän tärcemä itkändä “İslam Azatlıq partiäse” digänne añlata. Sönnilär oyıştırğan dini-säyäsi partiä 1953елдан birle dönyada cihat yulı belän xalifät tözü öçen köräşä. Şunısı üzençälekle, islam illärendä dä älege partiäne tanımıylar. Ämma anıñ filiallarınıñ Misır, İordaniä, Törkiä häm Könçığış Yevropa illärendä buluı bilgele.
Monnan ike yıl elek Başqortstanda da älege törkemgä qarağan 15 keşene qulğa alğannar ide. Xizb ut-Taxrir äğzaların Qazanda totqarlawnıñ da bu berençese genä tügel. 2004-2005 yıllarda Eçke eşlär häm federal qurqınıçsızlıq xezmätkärläre mondıy operatsiä başqarğan ide inde.
Çulpan Näbiullina
