Soñğı aylarda kommunistlar Çallıda şaqtıy aktiv eş alıp baralar, yäğni, daimi räweştä miting-uram cıyınnarı ütkärälär. 10 nçı dekaberdäge uram cıyını keşe xoquqları köne belän bäyle bulıp, mäñgelek ut kompleksında uzdı. Çığış yasawçılar cirle xakimiätkä, respublika häm Rusiä idäräçelärenä tänqit süzlären audırıp qına tordılar. "Yedinaya Rossiä" firqäse dä çittä qalmadı, ildäge xäyerçelekne, eşsezlekne, näk şuşı "Yedinaya Rossiä" belän bäyläp kürsätergä omtıldılar. 400 gä yaqın keşe qatnaşqan şuşı cıyında fatir, toraq kodeksınıñ ğadi xalıq öçen bulmawı äytelde: Zinaida Savarkova çığışı: "Toraq kodeksında xalıqnı aldaw yulı bik küp. Ägär fatir öçen tüli almıysıñ ikän, fatirıñnan çığıp kit! Yortlarnı tözätü häm başqa çığımnarnı däwlät xalıq cilkäsenä saldı. Xalıqnıñ zur öleşe xayırçelekneñ tege yağında yäşi."
Kommunist Savarkovadan soñ Çallı TİÜ räise Rafis Kaşapov süz ala. Ul, Rusiä prezidentı eteneñ bik yaxşı tormışta yäşäwe xaqında söyläde. Älege uram cıyılışına kommunistlar belän bergä ictimaği üzäk wäkilläreneñ dä kilüe ber üzençälek bulsa, tağın qızıqlı närsälär bar ide. Mäsälän, şuşında uq, diwarlarğa, çista zur qağäzlär yabıştırıp quyılğan. Şuşılarnıñ bersenä "Xalıq süze", ikençelärenä "Ägär min qazıy bulsam, "Yedinaya Rossiä"gä nindi cäza birer idem",- dip yazılğan. Azatlıq xäbärçese şuşındağı "Xalıq süze" belän tanıştı häm menä nindi süzlär uqıdı: KPSSnı, SSSRnı, urlanğan aqçalarnı kire qaytarığız!". Berniçä täqdim- yazmada tegelären atarğa, ikençelären asarğa, sänäkkä alırğa kiräk,- dielä. Şulay uq, bügenge xakimiät firqäsen kümer bazlarına, urman kisärgä cibärergä teläüçelär bar. Firqä isemenä monnan da sallıraq, tozlıraq yazılğan süzlär bar ide cıyınğa quyılğan taqtalarda. Cıyınnı alıp baruçı, älege täqdimnärneñ Mäskäwgä cibäreläsen dä belderde. İskä töşeräm, Atarğa, kisärgä, sänäkkä elärgä digän süzlär xalıqara keşe xoquqları köne uñayınnan oyıştırılğan uram cıyınına kilüçelär tarafınnan yazıldı. Monda rezolyutsiä qabul itelep, berençe mäddäşe:
- Rusiädä keşe xoquqları yuq. Konstitutsiä Rusiä keşesenä qol xoquqları ğına birä.
Şulay uq xakimiätne tänqit itüne tıyğan qanun konstitutsiägä qarşı kilä, dip bäyälände. Qabul itelgän rezolyutsiädä minimal' xezmät xaqın 6990, byudjetta eşläwçelärneken, eşçe häm xärbilärneken 12 meñ sumğa citkerü turında taläplär bar.
Ğafiulla Ğaziz, Çallı
