Soñğı aralarda böten Rusiä buylap xastaxanälär yandı. Mäskäwdä narkologiä dispanserı yanğanda 46 keşe dönya quyğan. Alarnıñ kübese xastaxanädä yatqan xatın-qızlar. Yanğınnar Qazannı da çitlätep ütmäde. Çärşämbedä Qazan Kirmäne yanında urnaşqan yaman şeş awırıruları xastaxanäsendä ut çıqtı. Şöker, Qazandağı yanğında qorbannar yuq.
Yanğında xastaxanäneñ administrativ binası zıyan kürgän. Ut töşke aş waqıtında çıqqan. Berniçä minut eçendä administiv bina tulısınça ut belän qaplanğan. Ul waqıtta anda 10 keşe bulğan. Alar hämmäse dä xastaxanä xezmätkärläre. Qotqaruçılar kilgänçe ük mediklarnı uttan çığara başlağannar. Ni xikmät, älege taciğa aldınnan ber ay elek xastaxanädä yanğınnan çığu buyınça uqular uzğan bulğan. Häm uqular waqıtında xastaxanä xezmätkärläre yanğınnan üzläre genä qotıla almağan. Ä çärşämbe könne binada inde çınlap ta ut çıqqanda, alar xastaxanädäge barlıq keşelärne dä qotqaruçılar kilgänçe ük irekkä çığarğan.
Älege yanğında qorbannar yuq. Çönki xastaxanäneñ töp binası, awırular yatqan bülege, çittäräk urnaşqan. Aña bernindi dä zıyan kilmägän. Qotqaruçılar ut belän köräşkän arada xastaxanä ğädättägeçä eşläwen däwam itkän. Öç säğättän soñ xastaxanäneñ administrativ binası utan azat itelgän. Binada yanğın mäydanı 160 kvadrat metrnı täşkil itkän. Monnan tış tübäse dä şaqtıy yanğan. Xastaxanäneñ baş tabibı Marat Sadıykov belderüençä, yanğınnıñ säbäbe - elektr liniäseneñ tözek bulmawı. Älege xastaxanäneñ binası bik iske bulğan.
Yıl inde tämamlandı diärlek. Onkologiä dispanserı yanğın çıqqan binalar isemlegen tağın ozınayttı. Ä barlığı bıyıl Tatarstanda 3 meñnän artıq yanğın bulğan. 200 dän artıq keşe, şular arasında 9 bala utta wafat bulğan, dip xäbär itä ğädättän tış xällär ministrlığı. Küp oçraqta yanğın çığu säbäbe - alkogol'' eçemleklär qullanu.
Albina Zäynulla
