Accessibility links

Dikaberdä Omskida Sabantuyı


Dekaber ayında Omskinıñ 7-nçe sanlı balalar yortında Sabantuy bäyräme bulıp uzdı. Döres, bäyräm biredä kürsätmä däres räweşendä, tärbiä çarası bularaq, 1-nçe sanlı pedagogiä kolliäteneñ tatar studentları tarafınnan ütkärelde. Tıñlawçılar xäterläsä, älege kölliätneñ 5-nçe kurs studentlarınıñ oktäber-dekaber aylarında pedagogik praktika uzuları turında xäbär itkän idek. Bu eştä qayber awırlıqlar kilep çığuı - bıyıl Omskinıñ ber genä mäktäbendä dä tatar tele uqıtılmaw säbäple, praktikanı studentlar üzläre uqığan kölliättä, ä tärbiä çaraların yätim balalar yortlarında ütkärergä niätläwläre turında da citkergän idek. Tatar tele buyınça däreslär inde tämamlandı, planda qaralğan tärbiä çaraların ütkärü dä axırına yaqınlaşıp kilä. Çirattağı şundıy çara, aldan äytkänebezçä, şähärneñ 7-nçe sanlı balalar yortında ütte. Ul törle xalıqlarnıñ milli bäyrämnärenä, ayırım alğanda, tatar xalqınıñ sabantuyına bağışlanğan ide. Studentlar başta balalarğa sabantuy bäyrämeneñ tarixı, ütkärü räweşe turında söylädelär. Annan soñ balalarnı sabantuy barışında uynalğan uyınnar belän tanıştırdılar, alarnıñ qayberlären bergäläp uynadılar da. Balalar qapçıq kiep yöğerdelär, arqan tarttılar, yomırqa salğan qaşıq qabıp uzıştılar, çülmäk watıp qaradılar. Ciñüçelärgä konfet, keçkenä suvenir kebek büläklär dä birelde. Äytergä kiräk, uyınnar simvolik räweştä genä bulsalar da, balalar aktiv buldılar, ber-bersenä köç birep tordılar.

Tıñlawçılarnı qısqaça ğına balalar yortında tärbiälänüçelär belän tanıştırıp kitü dä urınlı bulır. Bügenge köndä anda 68 bala tärbiälänä. Balalarnıñ barsı da tulı yätim tügellär, küpçelegeneñ äti-äniläre bar. Ämma eçkeçelek, yäki äxlaqsızlıq säbäple alar ata-ana xoquqınnan mäxrüm itelgännär, balaları xökümät qaramağına tapşırılğan. Şunsı qızğanıç, andıylar arasında tatarlar da yuq tügel. Älege çarada qatnaşqan 30-ğa yaqın bala arasında da öç tatar balası bar ide. Tärbiäçe Natal'ya Muor süzlärençä, bu balalarnıñ äniläre rus, ätiläre tatar millätennän. Ana balaların xämergä alıştırıp, taşlap kitkän. Xämer belän dus bulğan äti keşe dä balaların tärbiäli almağan, alarnı yätimnär yortına tapşırğan.

Äytergä kiräk, balalar yortında yäşäw şartları naçar tügel: balalarnı kienderü, tuqlandıru, belem birü, hönärgä öyrätü – barsı da yaxşı däräcädä quyılğan. Ämma şunsı ayanıç, biredä balalarğa milli tärbiä bötenläy birelmi disäk, yalğış bulmas. Balalar üzläreneñ qaysı millättän buluların, näsel-näsäplären belmi üsälär. Ätise tatar millätennän bulğan 10 yäşlek Veronika Gilyäzetdinova, mäsälän, üzen rus millätennän dip sanıy. Balalar yortında şunsı da küzgä taşlandı, tatar balaları ğına tügel, başqa millät balaları da, nindi millättän buluları turında belmilär. “Sine qaysı millättän “ digän sorawğa ber genä bala da anıq cawap birä almadı, alar öçen millät digän süzneñ mäğnäse dä, ähämiäte dä yuq kebek toyıldı. İreksezdän, menä şulay , balalarnı millätsez häm milli añsız tärbiäläw kiläçäktä millätlärneñ kimi, ä manqortlarnıñ arta barularına alıp barmıymı ikän digän soraw tua. Küñelgä menä şundıy borçulı uylar da kilde kürkäm genä ütkän sabantuy çarasındağı aralaşular waqıtında.

Saniä Mirxaleeva, Omski

XS
SM
MD
LG