İran, BMO İminlek Şurasınıñ kiçäge qararına cawap itep, Natanztağı uran bayıtu berläşmäsenä 3 meñ sentrifuga urnaştıruın belderde. 23 dikaber könne kiç İminlek Şurası İranğa öleşçä çikläwlär kertü turında rezolüsiä qabul itte. İran prezidentı Mäxmüd Äxmädinecad, rezolüsiäne – çüp qağäze dip atadı, häm İminlek Şurası mondıy qarar qabul itkänenä ükenäçäk, dip belderde:
"Sezneñ bu qararığızdan İranğa ber nindi dä ziyan bulmayaçaq, dip äytä alam, kiresençä, üzegez ükenäçäksez."
Rezolüsiä eçtälege, başta Britaniä, Fransiä häm Germaniä täqdim itkän ölgedän yomşağraq, İrannı Rusiä yaqlap çıqtı.
İzrail rezolüsiäne xuplap çıqtı. Premyer-ministr Ehud Olmert, "rezolüsiä, İrannıñ atom programmasın tuqtatu öçen näticäle adım bulaçaq" dip belderde.
