Başqortstan Däwlät Cıyılışı-Qorıltay deputatları üzläreneñ bıyılğı eşçänlegen başlap cibärde. Atnakiç häm comğa könne ike komitet äğzalarınıñ utırışları ütte dä inde. Anda deputatlar buş qul belän kilmägän bulıp çıqtı. Yaña qanunnar ölgelären urtaq tikşerü öçen täqdim itte alar.
Ber qanun ölgese Başqortstanda alkogol'le eçemleklär satu säğätlären qısqartunı küz uñında tota. Ämma bu qanun ölgese deputatlar arasında da, başqa yuğarı wazıyfalı citäkçelär dairäsendä dä qarşılıqlı fikerlär tudırdı. Misal öçen, Başqortstannıñ Tışqı iqtisadıy bäyläneşlär häm säwdä ministrı Boris Qolbin bu adımğa barudan tıyılıp torırğa çaqırdı. “Mondıy alımnar elek tä buldı häm alar üzen aqlamadı”, - dip belderde ul.
Parlamenttağı bäysez deputat Edvard Murzin, härwaqıttağıça, tağın üzençälekle qanun ölgesen täqdim itte. “Ber ük cenestäge keşelärneñ nikaxlaşuı turında” dip atalğan bu qanun ölgesen Başqortstan Däwlät Cıyılışında qarap, soñınnan Rusiä Däwlät Dumasına da täqdim itmäkçe Edvard Murzin. “Bar dönyada ber cenestäge keşelärneñ bergä buluın yaqlaw arta barğan ber mäldä Rusiä dä bu wäzğıättä çittä qalırğa tieş tügel”, - dip belderä härçaq üzgä qaraşlı bulğan bu deputat. Ämma bu qanun ölgesen zur küpçelegen “Berdäm Rusiä” partiäse äğzaları biläp torğan Başqortstan parlamentı wäkilläre tikşerügä çığarırmı-yuqmı, anısın äytüe qıyın.
