Uzğan şimbädä Omskiğa zur konsert programması belän Tatarstannıñ häm Başqortstannıñ atqazanğan atristı Aydar Galimov kilep kitte. Bu Aydarnıñ Omskiğa berençe kilüe. Anıñ konsertı ölkä filarmoniäseneñ konsertlar zalında ütte. Berençe märtäbä kilüe bulsa da, cırçını omskilılar yaxşı belälär ikän, 1200 urınlıq zalda buş urın qalmağan ide diärgä mömkin. Şunsı da iğtibarğa layıq, zalda yäşlär dä küp ide. Tamaşaçılar Aydarnıñ här çığışın cılı qarşıladılar, köçle alqışlarğa kümdelär, küpläp çäçäk bäylämnäre büläk ittelär. Konsert tämamlanğannan soñ, säxnägä çığıp räxmät äytüçelär dä buldı. Konsertqa 200 çaqrım yıraqlıqtağı Bol'şereç'ye rayonında yäşäwçe Räkiä Yakupova Aydar Galimovqa bağışlap, şiğer yazıp alıp kilgän ide. Anı ul zalda utıruçılar aldında uqıp, Aydarğa büläk itte.
Konserttan soñ artistlar tatar xäräkäte aktivistları belän oçraştılar. Aralaşu barışında Aydar “Azatlıq” xäbärçese sorawlarına da cawap birde. Süzen ul Omski radiosında “Säläm” tapşıruınıñ tergezelüenä şat buluın belderüdän başladı. Annan soñ, Omski tamaşaçısınnan qänäğät qaluı, aldağı yıllarda qabat bu yaqlarğa kilep çığarğa teläge barlığın belderde. “Qartağa qarasañ, Omski Rusiäneñ urtası ğına bit. Yıraq Seber yaqlarında da cır-moñ söyuçe millättäşlärebez yäşi. Alar belän dä oçraşırğa waqıt citte. Barası yulıbız, oçraşası duslarıbız küp äle, Xoday isänlek-sawlıq birsen barıbızğa da,”-dide ul.
