Jurnalistlarnı yaqlaw komitetı Rusiä häm Venesuela prezidentları, Vladimir Putin häm Hugo Çaveznı "xalıq tarafınnan saylanğan autokratlar, "demokratatorlar" dip atadı.İke citäkçe dä, üz illärendä mäğlümat çaraların awızlıqlaw häm täsir itü öçen qanuni qısalar tudırğan, dielä komitetnıñ yaña xisabında. Putin 2000nçe yılda xakimiätkä kilgännän birle Rusiädä 13 jurnalist üterelgän. Komitet başlığı Joel Simon, küptän tügel Mäskäwgä bulğan säfäre waqıtında, jurnalistlar üleme turında ministrlıq wäkilläre belän söyläşkänen belderde:
"Tışqı eşlär ministrlığı wäkilläre belän Rusiädä cäzağa tartılmaw turında söyläştek. Putin prezident bulğannan birle 13 jurnalist üterelgän. Bu cinäyätlärneñ berse dä tikşerelmägän."
Häm Putin uzğan atnada berençe tapqır, Rusiädä jurnalistlarnıñ role bik zur dip äytte, dip östäde Simon. Jurnalistlarnı yaqlaw komitetı xisabında, şulay uq, 2006nçı yılda 55 jurnalist üterelgän, alarnıñ 32se – Ğiraq suğışın yaqtırtqanda häläk bulğan, dielgän.
