6 fevral'dä migratsiä xezmätenä qağılışlı yaña qanun ğämälgä kerde. Moña qädär yaña tuğan balanıñ watandaşlığın raslawçı dokumentnı tuu turındağı tanıqlıqqa östäp birelä torğan yazu - vkladış üti ide. Xäzer balanıñ watandaşlığın bilgeläw öçen barı ber ştamp qına da citäçäk.
Tuu turındağı tanıqqa östäp birelä torğan käğäz balanıñ watandaşlığın raslawçı töp dokument bulıp isäplände. Şuña kürä dä çit ilgä çığu öçen, pasport häm federal' posobielär alğanda älege käğäzneñ buluı mäcbüri ide. Älegä qädär. Xäzer isä älege östämä käğäz – vkladışnıñ rolen tuu turındağı tanıqlıqqa quyılğan ştamp üti. Bu kiläçäktä kiräkle dokumentlar buldırğanda eşne küpkä ciñeläytäçäk, di migratsiä xezmätkärläre.
Tanıqlıqqa älege ştampnı ata-anası Rusiä watandaşı bulğan barlıq balalar da ala alaçaq. Bala tuğan waqıtqa Rusiä watandaşlığı alırğa ölgermägän migrantlar öçen isä taläplär başqaçaraq. Bu oçraqta migrant ata-analar ni eşlärgä tieşlege turında Rusiä migratsiä xezmäteneñ Tatarstan buyınça idäräseneñ watandaşlıq mä’säläläre bülege xezmätkäre İldar Mostafin söyli.
Çit il watandaşları bulıp isäplängän ata-ana balalarına Rusiä watandaşlığı birergä telilär ikän, alar üz illäreneñ cawaplı oyışmalarına möräcäğät itärgä tieş. Ägär çit il alarnıñ balasına üzläreneñ watandaşlığın birmi häm monı raslawçı dokument ta bar ikän, bez bu balanı da Rusiä watandaşı dip qabul itä alabız. İldar Mostafin äytüençä, ata-anası Rusiä watandaşları bulıp isäplänsä, balanıñ qayda tuuına da qaramastan, aña Rusiä watandaşlığı birelä. Ämma törle ildä watandaşlıq alu mä’säläse törleçä.
Güzäl Zıyätdinova
