8 fevral'', Ufada tatar biznesmennarı isäbenä tözelüçe tatar gimnaziäsen xakimiätlär qararı belän cimerüdä, xälitkeç köngä äylände. Şunısı ğibrätle: 7 fevral''dä gimnaziäne cimerüdä töp qoral bulğan “Xitaçi” ekskavatorında eşläwçe keşe, kiçen eşen taşladı häm açlıq iğlan itüçelär yanına kilep alarğa teläktäşlek belderde. “Min Allağa ışanam. Kitäm häm monda bütän kilmim. Uñışlar häm ciñü sezgä”, - dide ul xuşlaşqanda. Ämma, anı alıştırğan keşe äxlaqi ğazaplar kiçerüçegä oxşamağan. Ul ber kön eçendä elekkese biş kön eçendä watqannan da kübräk cimerde. Ägär eşlär mondıy räweştä barsa, ike-öç könnän tatar gimnaziäse urınında kirpeç häm timer-beton plitäläre watıqları öyeme genä qalaçaq.
8 fevral''dä tatar milli oyışmaları häm ğadi Ufa tatarları gimnaziäne cimerüne kiçekmästän tuqtatunı taläp itep, Ufa şähäre xakimiäte qarşında piket ütkärdelär. Piketçılarnıñ küpçelege tatar gimnaziäsen cimerüne Başqortstan citäkçelegeneñ tatarlarğa qarata alıp barğan säyäsäteneñ küzgä bärep torğan misalı dilär. “Başqort türäläre tatarnıñ ruxın sındırırğa teli” – menä piketçılar awızındağı süzlär. Rusiä Federatsiäse pristavlar xezmäteneñ Başqortstan buyınça idärälege matbuğat sekretare Elmira Şagibalova “Azatlıq” radiosı xäbärçesenä: binanı cimerü qanuni räweştä eşlänä, bu turıda arbitraj mäxqamäseneñ qararı bar, dide. Anıñ raslawınça, bügen älege bina Ufa tatarları milli-mädäni moxtäriätenä qarasa da, arbitraj mäxqamäseneñ elekke qararı köçendä qala. Ä ni öçen, binanı gimnaziä itep tözep beterergä qarar qılınğaç, Ufa xakimiäte tatar cämäğätçelege süzenä qolaq salmıy häm şähärdä xakimiätlär öçen buşqa mäğärif uçağı barlıqqa kilüenä fatixa birmi – añlaşıla. Çönki andıy fatixanı respublika citäkçelege birmi. Ğibrätle xäl: cimerelüçe tatar gimnaziäsenä terätep, digändäy, restoran, kunakxanä salıp yatalar.
Älege gimnaziä öçen 20 million sum aqçasın sarıf itkän, RF Däwlät dumasınıñ elekke deputatı, Başqortstan tatarları milli-mädäni moxtäriäte räise, Bötendönya tatarları Kongressı başqarma komitetı äğzası, kürenekle biznesmen Ramil İmamäğzam ulı Bignovnıñ açlıq iğlan itüenä inde cide kön tuldı. “Räsmi xakimiätlärdän nindi dä bulsa cawap alınmıyça, açlıqnı tuqtatmıym”, - di ul. Anıñ belän bergä tağın biş keşe açlıq çarasında qatnaşa.
Älege yazmanı birgändä gimnaziäneñ yartısın cimerep baralar ide.
Kärim Yauış, Ufa
