Accessibility links

Кайнар хәбәр

Tatarstan deputatları Çallıda cıyıldı


Tatarstan Däwlät Şurası prezidiumı ägzaläre Çallığa 8 nçe fevral' könne kildelär häm köne buyı şähärneñ törle şirkätlär, sotsial' oyışmalar eşçänlege belän tanıştılar. Däwlät Şurası deputatlarınıñ töp maqsatı-Rusiä küläm qabul itelgän milli proyektlarnıñ Çallı cirendä niçek ütälüe belän tanışu. Şul uq waqıtta biredä Däwlät Şurası prezidiumınıñ küçmä utırışın ütkärü dä qaralğan ide. Utırış xakimiät binasında ütte häm anı açıp cibärgändä Şura räise Färit Möxämmätşin bolay dide:

- Bez Qazanda Däwlät Şurası diwarları eçendä genä eşlärgä cıyınmıybız, regionnarğa çığunı da maqsat itep quydıq. Menä milli proyektlar yünäleşendä Çallınıñ alğarış ruxında eşläwen kürdek. Mart ayında Yäşel Üzändä şuşındıy utırış farazlana. 2007 yılda cämğısı 15 rayon häm şähärdä bulaçaqbız."

Qayber çığışlarğa tuqtalam. Çallı tözeleş idäräse başlığı urınbasarı Anatoliy Kotvitskiy ipoteka häm başqa ısullar belän fatirlarnıñ küp tözelüen äytte. Läkin anı fatirlarnıñ, ayırım alğanda ber kvadrat metrnıñ torğan sayın qimmätlänüe borçıy. Mäsälän, ber fatirnıñ üz qimmäte bügenge bäyälärneñ 59%ın täşkil itä. Qalğan 41%ı infrastrukturağa kitä. Xäzer yaña tözelä torğan bistälärdä yul salu probleması tuğan. Alğa taba şuşı yullarnı yasaw çığımnarı yaña fatir bäyäsenä östälergä mömkin häm ber kvadrat metrnıñ bäyäse tağın 30%qa artu ixtimalı bar. Çallı şähär şurası deputatı Svetlana Zaxarova sälämätlek saqlaw obyektlarınıñ şähärdä citärlek bulmawı, aşığıç yärdäm kürsätü xastaxanäseneñ inde 35 yıl tözelep tä, haman tözelep betmäwen äytte. Monnan ber yıl elek bu xastaxanägä qimmätle meditsina cihazları qaytarılğan häm alar xäzer tuzan cıyıp yatalar. Svetlana xanım tözeleşne tizlätü öçen Tatarstan häm Rusiä xökümätlärennän yärdäm sorıy. Tatarstan Däwlät Şurasınıñ iqtisat häm investitsiälär komitetı räise Marat Galiev byudjet oyışmaları maşinaların benzin urınına gaz yağıp yörtergä täqdim itte. Läkin, dide ul, maşinağa salınğan qaznı benzin şikelle urlap bulmıy, şuña, qazğa küçärgä telämilär.

Mädäniät, fän, mäğärif häm milli mäs'älälär komitetı räise Razil Väliev, yaqın kiläçäktä mäğärif ölkäsendä 5 meñnän artıq ştat qısqartırğa mömkin, mäsäläne komplekslı xäl itärgä täqdim itte. Çallı-Qazan yulı mäsäläse dä kütärelde. Älege yulnı xalıq ülem yulı dip atıy. Bu fiker belän kileşäm, dide spiker F.Möxämmätşin häm problemanı xäl itü öçen kimendä 160 mlrd. sum kiräklegen äytte. Utırıştan soñ parlament räise F.Möxämmätşin jurnalistlarnıñ sorawlarına tiz arada cawap birep, Mäskäwgä aşığuı turında äytte.

Anda Rusiä belän wäkälätlär almaşu turındağı şartnamä Däwlät Dumasında tikşerelä. Şartnämä Dumada tikşerelä başlawğa sanawlı ğına säğätlär qalıp barğanda Tatarstan parlamentı räise F.Möxämmätşin fikere:

-Bu şartnamä 1994 nçe yılğı şartnamäneñ däwamı. Bez aña Däwlät Şurası komissiälärendä üzgäreşlär kerttek, rasladıq. Xäzer şunı Rusiä prezidentı V.V.Putin qanun bularaq Däwlät Dumasına täqdim itte. Bügen 16 säğättä ul qaralaçaq. Uylawımça şartnamä qabul iteler, härxäldä şulay telim. Çönki anda Konstitutsiägä qarşı berni dä yuq. Barı tik qayber mäs'älälär, salımnar häm iske neft' yatmaları buyınça Tatarstan häm Rusiä xökümätlärenä yaqınnanraq torıp eşlärgä kiräk bulaçaq."

Ğafiulla Ğaziz, Çallı

XS
SM
MD
LG