Ay sayın taratıla torğan kommunal' tüläw käğäzlären fevral' ayında 10 köngä aldaraq kiterdelär. Kommunal' tüläwlärneñ yaqınça 20%qa artuı xalıqta ällä ni ığı-zığı tudırmadı kebek, ä menä elektr energiäsenä qağılışlı tüläwlär Çallı xalqın berqädär canlandırıp cibärde. Bu yünäleştä üzgäreşlär şaqtıy. Berençese- Tatarstan Ministrlar Kabinetı qararı belän elektr energiäseneñ bäyäse 37%qa artqan. Bilgele bulğança, şähär yortlarında podyezd eçendä dä lampalar yanıp torırğa tieş. Fatir işeklären yaqtırtıp toruçı şuşı lampa öçen xäzer, 26 bülmäle fatirda yäşäwçe 4 keşelek ğailä 40 sum tülärgä tieş. Ber etajda 4 fatir buluın isäpkä alsaq, şuşı ğomumi urındağı lampa öçen tüläw bäyäsen sanaw qıyın tügel. Mäsälän, 2005 yılnıñ fevralendä ğomumi urındağı lampalar öçen urtaça 5 sum tülägännär. Tağın ber yañalıq, fevral' ayınnan başlap bik küp sandağı elektr xisapçılarnıñ kürsätüläre iğtibarğa alınmayaçaq. Yäğni, alar ğämäldän çığarılaçaq digän räsmi yazmalar da taratıldı. Döres, Rusiä Däwlät standartı 2000 yılda uq tögällek klassı 2,5 bulğan xisaplaw caylanmaların qullanudan alu turında qarar çığarğan bulğan. Bıyıl menä şuşı qarar buyınça eş itäçäklär inde energetiklar. Ägär elektr xisaplağıçıñ iskergännär rätenä kerä ikän, ut öçen urtaçadan çığıp, yäğni böten yortqa quyılğan ber xisaplağıç kürsätüennän tülärgä turı kilä. Urtaça tüliseñ kilmäsä, yaña xisaplağıç quydırasıñ. Monısı yaqınça 2500 sumğa töşäçäk. Menä şuşı üzgäreşlär, äytkänemçä, şähär xalqınıñ ber öleşendä rizasızlıq tudırdı. "Azatlıq" radiosınıñ daimi tıñlawçısı Läylä apa, Yaña Şähärdä yäşäwçe Xänif Nurullin, Mirxäbib Ğaripov şundıylardan. Läylä apa, mäsälän, monnan 2 yıl elek kenä elektr xisaplağıçın alıştırğanın äytte. Yaña qağidälär buyınça, dide ul, minem bu xisaplağıçım da iskergän bulıp çığa. Yañasın quydıru öçen ber aylıq pensiä kiräklegenä borçıla. Mirxäbib äfände ğomumi urınnardağı lampoçkalar öçen tüläwne qıybat dip sanıy. Çönki, bulmağan yaqtılıq öçen zur aqça tülärgä mäcbür itälär, küp waqıt yortlarnıñ podyezdlarında lampa bulmıy, yä urlanğan, yä watılğan bula, dide. Şuşı wäzğıät energetiklarğa eşne kisken räweştä arttırdı. Xalıq elektr xisaplağıçları quydıra başladı. Çönki energetiklar mäğlümätläre buyınça, şähärdä 70 meñgä yaqın elektr xisaplağıçın urlağannar, 40-50 meñen 1990 yıllar urtasında watqannar, cimergännär. Keşelär, yaña bäyälärdän qurqıp şularnı yañarta başladılar. Çallınıñ energetiklar idäräsenä 2 säğät däwamında köçkä şaltıratıp şunı beldem- elektr xisaplağıçı quydırırğa teläwçeneñ ğarizasın inde avgust ayına ğına qabul itälär. Qayber mäğlümatlar buyınça, Ryazan ölkäsendä xisaplağıçlarnı buşlay alıştıralar. Ä menä Ästerxanda xisaplağıçlarnı fatir xucası satıp ala, urnaştıru buşlay ikän.
Çallı, Ğafiulla Ğaziz
