Accessibility links

Кайнар хәбәр

Watannı saqlaw layıqlı bäyälänäme?


23 fevral' Rusiädä Watannı saqlawçılar köne bularaq berniçä yıl elek yal köne dip tä iğlan itelgäç, ir-atlar zur şatlıq kiçerde. Xärbi xezmättä bulğanı da, bulmağanı da xäzer bu könne çın urıs ğädäte buyınça tuğarılıp kitep yal itä.

Başqortstanda Watannı saqlawçılar köne uñayınnan uzğan könnärdä baytaq qına çaralar oyıştırıldı, ikençe dönya suğışı veterannarı, şulay uq törle qaynar noqtalarda suğışta qatnaşqan yaqtaşlarğa xörmät yözennän oçraşular, törle kiçälär ütkärelde. Comğa könne dä qotlawlar künderü häm alarnı qabul itü däwam itte.

Watannı saqlawçılar köne küp kenä ätilär häm babaylar öçen izge bäyräm, çönki alar törle xärbi alışlarda qatnaşqan, iminlek öçen qannarın tükkän. “Azatlıq” xäbärçese berniçä veteran belän söyläşep, şuşı bäyräm uñayınnan fikerlären beleşte. Ufada yäşäwçe elekke jurnalist Şäwkät Makulov ta ikençe dönya suğışı yalannarın arqılı-buyğa ütkän. Xätta Qıtayda tärcemäçe dä bulıp xezmät itkän ul. Kiräk bulğaç qıtayçanı da öyränergä mäcbür bulğan Şäwkät ağa älege bäyrämne üze öçen bik qäderle könnärneñ berse dip sanıy. Bu bäyräm könnärendä ölkännärgä beraz iğtibar artuı da söyenderä, di ul.

İkençe millättäşebez, Baqalı rayonınıñ İske Balıqlı awılında tuıp üskän Dayan ağa Murzin küptän tügel 85 yäşen bilgeläde. Ul da suğış yulların başınnan azağınaça ütep, üzen danğa kümgän. Partizannar otryadınıñ komandirı bulğan ul. Anıñ başı öçen Gitler üze 3 million alman markası wäğdä itkän bulğan. Ämma äsirlekkä ala almağannar “qara general” digän isem alğan Murzinnı. Slovakiädä, Çexiädä partizannar otryadlarına citäkçelek itü çorında iskitmäle batırlıqlar kürsätep, Çexoslovakiäneñ Milli Geroe isemenä layıq bula Dayan Murzin. Suğış betkäç, küp kenä oyışmalar aña Sovetlar Soyuzı Geroe isemen birdertü öçen dä möräcäğätlär belän çığa. Läkin ul möräcäğätlärneñ näticäse bulmıy. Xätta Slovakiä wäkilläre dä Dayan Murzinğa şul isemne alu öçen tırışlıq kürsätep qarıy. Läkin Mäskäwdä alarnıñ ğözerläre dä isäpkä alınmıy. Öç yıl elek Dayan ağa il prezidentı Vladimir Putin belän bergä Slovakiägä barğaç ta, slovak ayudaşları Putinğa şuşı xaqta iskä töşerep qarağan. Ämma başqa törle mäşäqätläre arasında ul da bu täqdimne onıtıp çibärgä küräseñ.

Dayan ağa Murzin üze bu xälgä älläni aptıramıy da, ise dä kitmi. Ul kübräk başqalar öçen ärneşä. Suğış veterinarına pensiälärneñ bik az buluına köyenä ul. “Xätta ike tapqır Sovetlar Soyuzı Geroe bulğan tatar, batır oçuçı Musa Gäräev ta tieşle xörmät kürmiçä wafat buldı. Nibarı 250 sum pensiä alıp açlıq çigendä yäşäde, - di Dayan ağa. – Suğışta ciñelgän nemetslar bezdän ällä niçä tapqır kübräk pensiä ala. Alar bergä oçraşqanda bezdän kölälär. Qızğanıp kölälär”, - di Dayan Murzin.

Dayan ağa süzlärençä, Tuğan cirne söyü här batırlıqnıñ nigeze ul. “Läkin Watannı saqlap küp mixnätlär kiçergän keşelär kiläçäktä qäder-xörmätne kübräk kürsen ide, - digän teläktä ul. – Alaysa xäzerge yäşlär ul-bu bula qalsa, Watannı saqlaw öçen bik aşqınıp ta tormasqa mömkin”.



XS
SM
MD
LG