Uzğan yäkşämbedä , “Umırzaya” tatar-başqort xalıq ansamble , konsert-kiçä oyıştırıp, üzeneñ 18 yıllığın bilgeläde. Älege çara kollektiv urnaşqan “Qızıl Gvardiä” mädäniät sarayında ütte häm anda 18 yıl däwerendä ansambl'dä şöğellänüçelärneñ küpçelege qatnaştı. Konsertnı alıp baruçılar ansambl'gä yörüçelär belän ayırım-ayırım tamaşaçılarnı tanıştırıp çıqtılar, alarnıñ kollektivnı üsterüdä kertkän öleşlären assızıqladılar. Ansambl'ne oyıştıruçılarnıñ berse bulğan Lälä Alimova üzeneñ çığışın berençe citäkçeläre Färit Yumaçikovqa räxmät äytüdän başladı.
Ansambleneñ xäzerge citäkçese Ğafiä Aleeva üzeneñ çığışın konsertlarğa daimi yörgän tamaşaçılarğa räxmätle buluın belderüdän başladı, annan soñ xalıqnı “Watannı saqlawçılar” köne belän täbrikläde häm bu köngä bağışlap, cır başqardı.
Konsert tämamlanğannan soñ tamaşaçılarnıñ qayberläre säxnägä menep, kollektivqa räxmätlären belderdelär, Omski töbägendä yäşäwçe tatar xalqına köylärebezne, moñnarıbıznı citkerep toruda öleşläre zur buluın assızıqladılar, ansambl'neñ ğömerle buluın telädelär. “Şunsı da bezne söyenderä, ansambl'dä yäşlär küp, biredä balalar belän dä şöğellänälär. Dimäk, kollektivnıñ kiläçäge bar”, - didelär çığış yasawçılar.
Saniä Mirxaleeva, Omski
