Azatlıq radiosınıñ Yaña Ğasır dulqınnarında 1 marttan başlap söyläwdän tuqtawına iñ zur reaksiä Çallı cirlegendä bulmadımı ikän? Älegä şulaydır. Çönki Azatlıqnıñ Yaña Ğasırdan tapşıruları tuqtaluğa borçılıp, xalıq cıyınnarınıñ berniçäsendä fikerlär äytelde. 23 fevral' könne Çallınıñ drama teatrı binasında tatar tele, tatar mädäniäte problemalarına qağılışlı cıyılış bulğan ide. Anda Çallı häm tirä-yaq rayon-şähärlärneñ tatar cämäğätçelege oyışmaları wäkilläre, uqıtuçılar, studentlar, cämğese 250 yaqın keşe qatnaştı. Berençe bulıp şuşında cıyılğan küpsanlı xalıqqa Azatlıqnıñ Yaña Ğasırdan tapşıruları birelmäyäçäge äytelde. Kön tärtibendäge mäs'älälär başqa bulğanlıqtan, waqıt az bulu säbäple cıyılışnı alıp baruçılar Azatlıqnı yaqlap süz äytergä teläwçelärgä süz birmädelär. Şularnıñ berse- cıyılışta qatnaşıp Azatlıq xaqında fikeren äytä almağan Asia xanım Zinnurova. Şulay da bez anıñ belän tabıştıq häm millät cıyınında ul mondıy süzlär äytergä telägän:
- Bötendönya tatarları häm başqortları yaratıp tıñlıy Azatlıqnı. Nigä "Yaña ğasır"da tuqtıy? Säbäben rätläp añlatuçı yuq bezgä. Bezneñ taläp- "Azatlıq" Yaña Ğasır dulqınnarında bulırğa tieş.
Azatlıq radiosı tiräsendä bulğan wäzğıät düşämbe könne Çallı TİÜe cıyınında da kütärelde. Biredä, prezidentı Putin bulğan Rusiädä demokratiä çatqıların beterü bara. Berençe çiratta bu urıs bulmağan xalıqlarğa qağıla. Milli respublikalarda häm milli tözelmälärdä ana telendäge matbuğatnı yabu küreneşe bara. Bıyılnıñ 1 martınnan tatar häm başqort tellärendä tapşıru alıp baruçı Azatlıqnıñ translyatsiäläre tuqtaluı şul isäpkä kerä- digän fikerlär äytelde. 1 marttan soñ Azatlıq radiosı tapşırularınıñ qayber öleşläre translyatsiälänergä mömkin digän mäğlümätlär dä Çallılarda berqädär bäxäslär tudırdı. Bu oçraqta da kemnärder Pragadan birelgän dönya xäbärlären tıñlarğa teli, qayberlärenä çit töbäklärdä yäşäwçe tatarlar tormışı kiräk, beräwlärgä Çallı, Qazan xäbärläre dä citä. Monnan şundıy näticä yasap bula, tatarğa "Azatlıq"nıñ xäzerge räweşe, berböten buluı kiräk. Azatlıq radiosınıñ qısqa dulqınnarğa küçüenä, yäğni, "Yaña Ğasır"dan kitüenä barlıq tatar da borçılamı? Yuq. 250 keşelek cıyında miña şundıylarnıñ bersen kürergä turı kilde. "Şäp bulğan! Şul kiräk!"- dide älege äfände "Azatlıq" xäbärçese belän küzgä-küz söyläşkän waqıtta. Şulay da, xalıq aldına säxnägä çıqqaç, "Azatlıq"nıñ yabıluı tatar-başqort öçen zur faciğä ikänen bilgeläp ütte. Älege äfändeneñ Azatlıqtan här atna sayın, xätta atnasına berniçä tapqır fikerläre işetelep tora.
Azatlıqnıñ Yaña Ğasırdan bulmawın işetkän İğlimä Şäydullina Aznaqaydan zur borçılu belän Çallı xäbärçesenä irtänge 6 şaltırattı häm mondıy täqkdimen citkerde: "Azatlıq tapşıruların Çallıda eşläwçe häm distägä yaqın rayon-şähärgä translyatsiä alıp barğan "Küñel" radiosı aşa tıñlaw mömkinlege bulmasmı?" Şuşı täqdim belän milli xäräkätneñ qayber aktivistları Çallınıñ "Küñel" häm başqa radiostansiälär citäkçelärenä möräcäğät yullarğa da äzerlär, digän, räsmi bulmağan mäğlümatlar bar.
Ğafiulla Ğaziz , Çallı
