Tatar telendä ber genä FM radio qaldı

Bu arada 4 radio tıñlawçısı borçıla. “Azatlıq” yaña ğasır kanalınnan öleşçä alındı. Şul räweşle “Yaña ğasır” auditoriäsenä zıyan kilde, alar borçıla berençe çiratta. İkençedän, “Törkiä awazı” tatar tapşıruları ike tapqır waqıtın kimette. Şulay uq, berençe tatar telle fm radio bulğan “Quray” da eşläwdän tuqtap qaldı. Häm menä 2 mart könne irtänge 6 dan Qazanda “Yaña ğasır” radiosınıñ tapşırğıçı saftan çıqtı. Anıñ urnına bügenge köndä rezerv tapşırğıçı eşläp tora. Qızğanıçqa qarşı, ul zäğif bulu säbäple anı işetü bik awır. Döres, Tatarstan rayonnarında häm sputnik tälinkä aşa tıñlap bula. Şulay uq 4-5 yıl elek “Dulqın” radiosı yabılğan ide. Häm “Tatarstan” däwlät radiosınıñ da formanı çeltär aşa tapşırıla torğan tapşırularınıñ tatar telle öleşe şaqtıy qısqartılğan ide. Menä şulay itep, radioefir üzeneñ krizislı periodına kilep citkän çatqıları kürengän kebek.

Bilgele bulğança 1 mart könne “Azatlıq” radiosı üzeneñ töp tıñlawçısın, döresräge anıñ iñ sallı häm märxämätle öleşen yuğaltu qurqınçı aldında qaldı dip sanıym. “Yaña ğasır” radiosında “Azatlıq” radiosı turıdan–turı söylämi başladı. Döresräge, köngä berniçä märtäbä, senzuradan uzğan öleşläre çığarılıp kerteläçäk. Bu nisbättän tatar–başqort telle “Azatlıq” radiosında yartı yıldan artıq räsmi räweştä boss bulıp eşläwçe citäkçese Kärim Qamal açıq xat tarattı. Bilgele bulğança, radioğa dinamika, real'–pop elementlar da östälgän ide. Anıñ formatı üzgärep, xalıqqa añlayışraq itep yasalğan ide.

Soñğı sotsiologik tikşerenülär dä “Azatlıq”nıñ Qazanda tıñlaw däräcäsen yuğarı buluın kürsätte.

“Bez translyatsiä yärdämendä asılda tatar wä başqort xalqınıñ demokratik wä milli üzañın üsterü, ireklek xisen arttıru eşenä zur öleş kerttek häm bu eş Tatarstannan ber tien dä aqça almıy başqaraldı”, – dip iskärtä Kärim Qamal. Häm şiklänmiçä äytep bula: şul demokratiä wä milli xistän Qazanda wä Mäskäwdä bardır möğayınder.”

Bälki yaptırtırğa telgän keşelär dä bulğandır, ämma “Azatlıq” radiosınıñ küpmeder däräcädä dulqınnardan dairäse kimep toruı tıñlawçılarnı şaqtıy borçuğa saldı. Älegä çolannardan iske tranzistorlarnı tartıp çığarıp, “Azatlıq” tapşıruların “salqın suğış” çorındağı kebek qısqa dulqınnarda tıñlaw mömkinlege qala. Küplär çınlap ta salqın suğışnıñ qaytuın iskärtä. Tik ul zamannıñ tranzistorları ğına çığarıp atılğan.

Şulay itep, 5 mart könne ber genä tatarça söyläwçe fm dulqın qaldı. Ul “Bars-Media” şirkäteneñ “Tatar radiosı”. “Quray” radiosınıñ citäkçese Radik Zlatov iskärtüençä, “Quray” radiosı yañadan efirğa çığaçaq. Älegä anıñ antennaları alıştırıla. “Yaña ğasır” da şuşı könnärdä üzeneñ tapşırğıçın yaxşırtır dip ömetlänäse qala.

Amil' Nur