Başqortstan Prezidentı Mortaza Räximov comğa könne respublikanıñ Dürtöyle rayonında häm şähärendä buldı. Anda ul yaña tözeleş binaların qaradı, şulay uq awıl xucalığı tarmağına qarağan şirkätlärdä häm xucalıqlarda da buldı.
Dürtöyle şähärendä bulğanda Mortaza Räximov biredä tözelüçe başqort gimnaziäse bilämälärenä dä bardı. Başqort gimnaziäse 340 urınğa isäplängän. Anda şulay uq zamança uqıtu kabinetları, sport zalı, xezmät künekmäläre bülmäläre, törle tügäräklär öçen dä kabinetlar bulaçaq. Älege mähabät bina bu yılnıñ 1 sentäberenä tözelep betäçäk, dip ışandırdılar Dürtöyledä Mortaza Räximovnı. Başqort gimnaziäse tözeleşe 100 million sumğa töşäçäk häm ul respublika qaznasınnan qaplana.
Dürtöyle rayonı häm şähäre saf tatar rayonı bulıp isäplänä. Biredä xalıq isäbe buyınça berençe urınnı tatarlar, ikençe urınnı ruslar bili. Başqa millätlär wäkilläre dä yäşi, ämma alar inde az sanlı biredä. Şuña kürä tatarlar küpçelekne täşkil itkän rayonda başqort gimnaziäse tözetüne şähär häm rayon xalqı rizasızlıq belän bulmasa da, bik aptırap qabul itte. Bu mäsäläne kütärep, Başqortstan Tatar kongressınıñ Dürtöyle şähäre häm rayonı bülege äğzaları törle belderülär dä qabul itep qarağan ide. Tanılğan cämäğät eşleklese Vener Fättaxov citäkçelek itkän bu bülek wäkilläre fikerençä, Dürtöyledä başqort gimnaziäse tözü – rayondağı häm şähärdäge tatarlarnı başqortlaştıru yünäleşendä alıp barılğan eşlärneñ berse ul. Vener äfände bu gimnaziägä bäyle ğibrätle xäl xaqında da söyläde.
“Şunısı qızıq - bu bina başta tatar gimnaziäse itep tözelä başlağan ide, - di Vener äfände. - Äy şawladılar tatar gimnaziäsen tözibez dip. İnde anıñ ike qatı tözelep tä betkän ide. Läkin şunı nigezenä qadär sütep, yañadan biredä başqort gimnaziäse tözi başladılar”. Vener Fättaxov süzlärençä, bıyıl eşli başlayaçaq başqort gimnaziäsenä uqıtuçılarnı konkurs nigezendä saylap alaçaqlar. Dürtöyleneñ üzendä başqort tele uqıtuçıları yuq. Şuña kürä dä bu konkurs respublika külämendä iğlan itelä. Başqort gimnaziäsendä eşläyäçäk uqıtuçılarğa Dürtöyle şähäre häm rayonı xakimiäte çiratsız fatirlar da birergä tieş bula.
Vener Fättaxov süzlärençä, saf tatar rayonı häm şähäre bulğan Dürtöyledä 340 urınğa isäplängän başqort gimnaziäsenä uquçılar cıyu ciñel eş tügel. “Ämma bu problema da ciñel xäl iteläçäk, - di Vener äfände. – Anda tatar balaların da bik teläp qabul itäçäklär häm alarğa başqort telen genä öyrätep qalmayaçaqlar, ä başqort ruxın da señderäçäklär. Älbättä, qayber tatar balalarınıñ ata-anaları da üz balaların monda üz teläge belän biräçäk. Çönki başqort gimnaziäsendä Dürtöyleneñ ber genä mäktäbendä dä bulmağan zamança şartlar tudırıla. Kemneñ inde üz balasın şundıy şäp belem uçağında uqıtası kilmäsen”.
