Accessibility links

Кайнар хәбәр

Omskida Salawat konsertı uzdı


Uzğan şimbädä Omskinıñ Ximiklar mädäniät sarayında meñnän artıq tatarnı cıyğan çara bulıp uzdı. Millättäşlärebez bu könne Salawat Fätxetdinov konsertın qararğa cıyıldılar. Salawatnıñ Omski şähärenä berençe märtäbä kilüe. Äytergä kiräk, konsertqa biletlar 1-2 atnağa aldan satılıp betkän ide. Ximiklar mädäniät sarayınıñ şähär çitendä urnaşqan buluına qaramastan, östämä urınnar bulır dip, konsert aldınnan biletsızlar da bik küp kilgän idelär. Dörestän dä, östämä 200-gä yaqın bilet satıldı häm şulay itep 1100 urınlı mädäniät yortında alma töşärlek tä urın qalmadı dip äytergä mömkin. Omskida bu qädär xalıqnıñ konsertqa küptän cıyılğanı yuq ide disäk bik döres bulmas – ay yarım elek Aydar Galimov icatın qararğa 1200 keşe kilgän ide. Monnan 15-20 yıllar elek Tatarstannan kilüçe artistlar 2-3 konsert birep kitälär, zallar da buş bulmıy ide. Ämma yıldan-yıl tatar moñın işetep kenä tügel, artistlarnıñ üzlären dä kürep qalırğa teläüçelärneñ sanı kimi bara. Çönki konsertlarğa kübräk urta häm ölkän yäştägelär yöri. İnde berniçä yıl ütkännän soñ, qalırmı ikän tatar moñına ixtıäc keşelär digän şöbhägä qalıp torğan çağında, bu ike tatar cır sänğäte yoldızınıñ kilüe, bar ikän äle tatar canlı bulıp üsüçe yäşlär digän ömet tudırdı. Konserttan soñ min qayber yäş tamaşaçılarnıñ fikerläre belän qızıqsındım. Minem, yäşlärne cälep itep bulırmı tatar mädäniätenä, digän sorawıma cawap birgän yeget rus telendä söyläşsä dä tatarça yaxşı añlıy ikän. Bulır, bügen tamaşaçılarnıñ dürttän ber öleşe yäşlär, kiläse yılğa öçtän ber öleşe, annan soñ yartısı da bulır dide ul.

Konsertnıñ üzenä kilgändä, Salawat teatr-studiäse tamaşasın xalıq yaratıp qaradı: räxätlänep kölde dä, här çığışnı köçle alqışlarğa da kümde, küpläp çäçäk bäylämnäre dä büläk itte. Konsertnı oyıştıruçı “Fäniä” yäşlär oyışması citäkçese Dinara Başirova süzlärençä, tamaşaçılar arasında Tevriz, Tara, Kolosovqa, Bol'şereç'ye rayonnarınıñ tatar awıllarınnan, Tömännän, Qazaxstannıñ Pavlodar, Novosibirski ölkäse Tatarski şähärlärennän kilüçelär bulğan. Tamaşaçılar asılda bik xislänep konsertnı maqtadılar.

Şulay da beraz başqaçaraq, cırlar az, yumor tupasraq, mäğnäsezräk, digän kebegräk fikerlär dä bulmadı tügel. Boları kübräk yäşlär ide.

Küpme keşe, şulqädärle fiker dilär, Salawat icatına da törleçä qararğa mömkin, ämma anıñ tatarlarnıñ üzañına uñay yoğıntı yasap, yoqlağannarın yoqısınnan uyatıp, tatar ikänleklären islärenä töşerep toruda öleşe zur buluı bäxässez.

Konserttan soñ Salawatqa berniçä soraw belän möräcäğät itärgä mömkinlek buldı.Berençe çiratta anıñ tatar cır sänğätenä qarata fikeren beläsem kilde.

Tatar cır sänğäte ni xäldä bügenge köndä?

Bu temağa säğätlär buyınça söyläşep utırırğa bula. Xäzer artıq küp cırçılar , yäşlär rus estradasına, çit il – törek, Amerika, Yevropa stilendä çitkä alıp kitep baralar, tırışalar, çın tatar moñı belän cırlawçılar bik az.

Yäşlärne cälep itü öçen kiräk dilär qayber keşelär, sez aqlıysızmı mondıy fikerne ?

Bezneñ cälep itärlek üzebezneñ menä digän moñıbız bar, ul bezgä genä xas, tatar cırın cırlar öçen tatar bulıp tuarğa kiräk, anı berkem cırlıy almıy, bu bezneñ bik zur baylığıbız. Tatarnıñ anıñ tübätäye bar da, çäk-çäge, häm cırı bar, anı da saqlamasaq… yuğisä telebez betep bara, balalarıbız rusça söyläşkängä ğorurlanıp yöribez… şuña kürä monıñ öçen älbättä suğışırğa kiräk beraz, äytergä kiräk, talaşırğa kiräk, min üzem kafedra mödire bülege mödire universitetta, tatar estradasında, iñ berençe talap şul, tatarça belmäsägez säxnägä menmägez, suğıp töşeräm dim min alarğa usal itterep, çönki öç notalı moñsız köygä cırlawçılar belän dönya tulğan. Niçeğo bez toje bik küp, bez toje bik usal, bireşmäbez alay ğına

Yäşlärdän sez xörmät itkän, çınlap ta tatar cırçısı bulırday kemnär sezneñ fikeregezçä?

Räsim Nizamov, Röstäm Zakirov, alar az tügel, moñlı cırçılar bezdä citärlek

Bügen zal şığrım tulı buldı, sez uylağan idegezme Omskida xalıq küp bulır dip

Bu qädär bulır dip kötmägän idek, bezneñ öçen moña qädär iñ yaxşı tamaşaçılar Çiläbe belän Orenbur ide, ämma Omski uzdırdı, şul kädärle çın küñeldän şayara belü, añlıy belü, kölä belü...

Salawat Omski tamaşaçısına tögäl wäğdälär birmäsä dä , yazğan bulsa, tağı küreşerbez, dip xuşlaştı.

XS
SM
MD
LG