Accessibility links

Кайнар хәбәр

Federal migratsiä başlığı Romodanovskiy Qazanda


Qazanda Federal' migratsiä başlığı Tatarstannan kitärgä mäcbür bulğan möhacirlär üzägen açtı. Rusiädä berençelärdän sanalğan älege üzäkne açu tantanasında Tatarstan prezidentı M.Şäymiev dä qatnaştı. Üzäktä mäxkämä qararı buyınça Rusiädän çığarıp cibärelergä tieşle möhacirlär waqıtlıça yäşäp toraçaq. Üzäktä könküreş öçen barlıq uñay şartlar buldırılğan, şunda uq migratsiä xezmäte idäräse dä açılğan.

Möhacirlek mäs’äläse Rusiäneñ awırtqan cirläreneñ berse. Tatarstanda açılğan migrantlar üzäge dä şuşı mäs’äläne cayğa saluda ber adım. Bilgele bulğança, şuşı yılnıñ 15 ğinwarda möhacirlekkä qağılışlı yaña qanun ğämälgä kertelgän ide. Federal' migratsiä başlığı Konstantin Romodanovskiy belderüençä, älege qanun ildä şaqtıy uñışlı eşläp kilä. İdel buyı töbäklärendäge migratsiä xezmäte citäkçeläre belän uzğan kiñäşmädä Romodanovkiy yaña qanunnıñ eşçänlege häm näticäläre turında söyläde. Federal' migratsiä başlığı belderüençä, Rusiädä ber million çit il keşese xisapqa alınğan. İlgä qanun nigezendä kilüçelär häm eşläwçelär sanı berniçä tapqırğa artqan. Häm şunıñ näticäse bulıp, çit il keşeläre tarafınnan eşlängän cinayätlär sanı kimegän, dide federal' migratsiä citäkçese.

Bazarlarda satu itüçe çit il keşelären kimetü mäsäläsenä kilgändä dä Romodanovskiy şundıy uq optimistik qaraşta tora. Bilgele bulğança, yaña qanun nigezendä 1 aprel'gä qädär bazarlarda barı tik 40% qına möhacir qalırğa tieş bulsa, 1 aprel'dän başlap Rusiä bazarlarında alar bötenläy satu itmäskä tieş bulaçaq. Kemnärder älege qanunnıñ tormışqa aşırıluın tüzemsezlek belän kötsä, ikençelär isä tağın bäyälär kütäreler, bazarlarda kemnär eşlär ikän soñ dip şiklänä. Federal' migratsiä başlığı älegä rusiälelärneñ bazarda satırğa teläge zur bulmawın äytte. Ämma ul beraz waqıt uzğaç, bazarlarda rusiä xalqınıñ artaçağına ışanıçın belderde. Romodanovskiy bazarlarda qatlawlı wäzğıät yuqlığın äytte. “Veçernyaya Qazan” basması andıy qıtlıq turındağı imeş-mimeşlärne yazıp çığarsa da, ul nigezsez dide migratsiä başlığı:

Min bügen şul üzäktäge bazarğa bardım. Ämma anda tovar häm satuçılar qıtlığın ber dä toymadım. Ğädättägeçä, tovar belän tulı ide ul. Kem mondıy imeş-mimeşlärne çığara, nindi maqsat belän - min belmim.

Federal' migratsiä başlığı Konstantin Romodanovskiy buldı. Şulay da qayber belgeçlär Romodanovskiynıñ bu fikerläre belän kileşmi. Häm wäzğıät qatlawlıraq dip sanıy.

Al'bina Zäynulla

XS
SM
MD
LG