Accessibility links

Mäskäw Kosovo bäysezlenä qarşı


Kosovoğa şartlı räweştä bäysezlek täqdim itkän plan Berläşkän Millätlär Oyışmasınıñ İminlek Şurasında kiläse düşämbe 26 mart könne qaralaçaq. Bu täqdimnärne oyımanıñ maxsus wäkile Marti Ahtisaari äzerläde. Şurağa kergän AQŞ, Fransiä häm Britaniä plannı yaqlıy, Rusiä – qarşı çığa. Ni öçen Rusiä Kosovonıñ bäysezlegenä qarşı?

Balkanda yañadan suğış cilläre isä.. Yevropa Berlege, ägär dä Kosovo statusı turında qarar qabul itelmäsä, töbäktä totrıqsızlıq, xattä inqilap häm tärtipsezleklär ixtimalı turında kisätte. Bosniä suğışında tınıçlıq kileşüen äzerlägän amerikan diplomatı, Richard Holbrooke, ägär dä köç qullanu qabınsa – monıñ öçen Rusiä cawaplı bulaçaq, dip belderde:

"Kosovo hiçşiksez bäysez bulaçaq. Rusiäneñ Marti Ahtisaari planına qarşı çığuı – eşlärne bik qatlawlandıra. Ägär dä Ahtisaari täqdimnäre kiläse ayda İminlek Şurasında xuplanmasa – Kosovoda qan qoyış başlanaçaq, häm bu – Rusiä eşe näticäse bulaçaq. "

Rusiä räncede. Bu düşämbedä ilneñ BMOdağı wäkile Vitaly Çurkin İminlek Şurasınıñ Kosovoğa bağışlanğan utırışın taşlap çığıp kitte. Soñınnan ul oyışmanıñ Kosovodağı wäkile Joachim Rueckernıñ çığışına rizasızlığın belderde:

"Anıñ belderüe ber yaqlı häm faydasız ide. Bu aldıbızda torğan tağın ber problema. Minemçä süz Kosovo turında barğanda, ber yaqlılıq bula almıy."

Rusiä, Kosovoğa bäysezlek birü planında, andağı serb azçılığın yaqlaw çaraları qaralmağan, dip sanıy. Tışqı eşlär ministrı Sergei Lavrov, çärşämbe könne Däwlät Dumasına, serb mänfäğätläre yaqlanmasa, Mäskäw planğa qarşı çığaçaq, dip belderde.

Ahtisaari planında Kosovoğa şartlı bäysezlek täqdim itelä. Yağni anıñ üz konstitusiäse, aläme häm gimnı bulaçaq. Ämma töbäk, bigräk tä serblarnı yaqlaw öçen xalıqara cämäğätçelek küzätüe astında qalaçaq.

Azatlıq radiosınıñ säyäsi küzätüçese Patrick Moore süzlärenä qarağanda, urtaq fikergä kilü ixtimalı – bik keçkenä.

"Kosovo mäsäläse belän az bulsa da tanış bulğan här keşe – ike yaqnı da qänäğätländererlek çişeleşneñ bulmawın yaxşı añlıy."

Germaniäneñ tışqı mönäsäbätlär şurası äğzase Alexander Rahr, Rusiäneñ Kosovoğa qarata säyäsäten menä niçek añlata:

"NATOnıñ kiñäyüe, Yevropa Berlegeneñ kiñäyüe, xäzer Polşa häm Çexiädä raketa qalqannarın tözü – Yevropa-Rusiä arasın tağın da yırağayta."

Häm älbättä, elekke Sovetlar Berlege cirlegendä ber qabınıp ber süngän nizaqlar.. Ägär dä Kosovo bäysez bula ala ikän, ni öçen Mäskäw yaqlağan Dnestr buyına, Abxaziägä häm Könyaq Ossetiägä möstaqillek birmäskä? Mäskäw Kremlenä yaqın säyäsi küzätüçe Sergei Markov, BMOnı ikeyözlelektä ğäyepläde:

"Berläşkän Millätlär ber törle xällärne ber törle çişergä tieş. Abxaziä, Dnestr buyı, Könyaq Ossetiä bäysezlege turında söyläşmi torıp – Kosovo bäysezlege turında süz dä bulırğa mömkin tügel."

Möstaqillek häm üzbilgelänüneñ dä ike yağı bar, dip sanıy belgeçlär. Äytelgän 3 töbäk bäysezlek alsa, Rusiä öçen problemalar kübräk bulaçaq, digän farazlar bar.

Rusiädän törle fikerlär kilä, düşämbe könne Mäskäw İminlek Şurasında üzeneñ veto xoquqın – qararğa qarşı çığu xoquqın qullanırmı-yuqmı bu sorawğa belgeçlär dä cawap birä almıy. Veto xoquqın Rusiä inde 10 yıldan artıq qullanmağan. Kosovonıñ üzendä isä, xalıqara tınıçlıq saqlaw köçläre – törle bäreleş-çualışlarğa äzer tora, NATO östämä ğäskär cibärde. Cirle xalıq isä – yañadan suğış başlanmasın digän ömettä yäşi.
XS
SM
MD
LG