Vitse-premyer Moratov berençe çiratta rayon häm şähärlärdäge 3 komissiäneñ - baliğ bulmağan balalar belän eşläw, administrativ häm popeçitel' komissiäläre eşçänlegennän raziasızlıq belderde. Bilgele bulğança, älege komissiälärne xakimiät häm militsiä wäkilläre citäkli. Tatarstan yustitsiä ministrı urınbasarı Qamil Bayyazitov çığışınnan kürengänçä, tözelgän komissiälär cinayätçelekne buldırmaw buyınça eşlise urında berketmä tözü belän mäşğül'lär. Näticädä, 2006нчы yılda 2005нче yıl belän çağıştırğanda yäşüsmerlär cinayätläre sanı rayon-şähärlärdä 10-15%qa artqan. Tübän Qama şähärendä mäsälän xökem itelgän yäşüsmerlär sanı 50% kübäygän. Wäzğıätne uñay yaqqa üzgärtü öçen yustitsiä ministrı urınbasarı yäşüsmerlärgä qarata komendant säğäte kebek, kiçke uramda yörü waqıtın çiklärgä täqdim itte. Ä menä Tatarstan eçke eşlär ministrlığınıñ cämäğätçelek qurqınıçsızlığı militsiäse başlığı Vasiliy Sokolov fikerençä, cinayätçelekneñ här yünäleştä üsä baruı uçastok militsionerlarınıñ tieşle däräcädä eşlämäwe belän bäyle. Xäzer uçastok inspektorlarınıñ eşe ayırım kürsätkeçlär, maxsus attestatsiä belän bilgelänä ikän. Şuşı kürsätkeçlärne Çallıdağı 121 uçastok inspektorınıñ 66сы, Alabuğada 28нең 15-ye, Aqtanışta 18 inspektornıñ 11-ye üti almağan. Respublikanıñ başqa töbäklärendä dä şundıy uq xäl. Uçastok militsionerlarınıñ küpçelege üzläre eşlägän rayonda yäşämilär, bu - alarnıñ eşen qıyınlaştıra, dip sanıy polkovnik Sokolov häm mondıy sannar kiterde. Tübän Qamada 109 uçastok inspektorınıñ 18 genä üz territoriäsendä yäşi, Mamadış rayonında 31 inspektornıñ barı berse genä eşlägän urınında tora. Qayber awıl cirlärendä militsiä punktlarınıñ bötenläy bulmawına vitse - premyer Rawil Moratov şaqtıy ğäcäplänü belderde. Uzğan yıl maxsus kürsätmä bulıp, Tatarstanda östämä 133 cämäğätçelek tärtiben saqlaw punktı açılırğa tieş bula. Misal öçen, Ägercedä 12, Aqtanışta 8 punkt açu küzdä totılğan, läkin bu eş käğäzdä genä qalğan. Eşne tözätü öçen rayon häm şähär citäkçelärenä Rawil Moratov 2 ay waqıt birde. Militsiä polkovnigı Vasiliy Sokolov äytkän tağın qayber sannarğa tuqtalam. Uzğan yıl Tatarstanda 8 uçastok militsionerı iserek kileş maşina yörtkändä GİBDD xezmätkärlärenä eläkkän häm alarnı ikençe könne eştän quğannar. Monıñ östenä 7 uçastok inspektorı xökem itelgän. 5-se wäkälätlären arttırğan, berse rişwät alğan, tağın berse totqarlanuçınıñ sälämätlegenä zıyan kitergän. Uzğan yılnıñ iyün ayında Älki rayonında şundıy waqiğa da bula: uçastok inspektorı mayor İsakov belän anıñ yärdämçese serjant Gonsov ber adämne totqarlıylar, anı urmanğa alıp kerep qayın ağaçına bäyläp quyalar häm urlawda ğäyeben tanunı taläp itälär.
Ğafiulla Ğaziz, Çallı
