Accessibility links

Кайнар хәбәр

Başqortstannan xalıq çitkä kitä


Ni öçender Başqortstanda yäşäwçelär yıldan-yıl çit töbäklärgä küçep kitä ikän. Ayıruça Ufada yäşäwçelärneñ başqa taraflarğa küçenep kitüe kübräk küzätelä. Şuşı xällär Başqortstan citäkçelegen dä borçuğa salğan. Şuña da Başqortstan Xökümätendä, bu xällärne tikşerü öçen, maxsus utırış ütkärelde. Kiñäşmäne premyer-ministr Rafael' Baydäülätov açtı häm alıp bardı.

Başqortstanda migratsiä xälläre 2004 yılda tiskäre yaqqa üzgärä başlağan. Näq menä şul yılda soñğı 16 yılda berençe tapqır çittän kilüçelärgä qarağanda, başqa cirlärgä küçep kitüçelär sanı kübräk täşkil itkän. Şuşı xäl 2005-2006 yıllarda da däwam itkän.



Utırışta çığış yasağan vitse-premyer, Xezmät häm xalıqnı sotsial' yaqlaw ministrı Fidus Yamaltdinov tögäl sannar belän söyläde. “2006 yılda Ufadan küçep kitüçelär genä dä 6 meñ keşe bulğan, - dide ul. – Çit illärgä küp keşe küçep kitkän. Bezdän xalıqnıñ kitüe säbäpläre törleçä. Kemnärder yaxşıraq eş urınına, kemder belem alu öçen, ä kemder başqa töbäklärdä fatir xaqları tübän bulğanğa kitä”.



Şuşı çığıştan soñ Rafael' Baydäülätov üzeneñ ğacäplänüen belderde. “Bäysez çığanaqlar mäğlümatlarına qarağanda, Başqortstan tormış öçen caylı buluı yağınnan Mäskäwdän qala ikençe urında tora. Ä nigä alay bulğaç xalıq bezdän qaça”, - di Xökümät başlığı.



Başqortstan premyer-ministrı Rafael' Baydäülätov fikerençä, respublika häm Ufa şähäre tormış öçen ocmax poçmağı kebek kürensä dä, anıñ alay uq bulmağanlığın ğadi xalıq bik yaxşı kürä. Ufada fatir bäyäläre qimmäte buyınça Mäskäwdän qala ikençe urında kilä. Şulay uq tuplanma äyberlär kärzine dä başqa töbäklär belän çağıştırğanda zurıraq külämdä kilep çığa. Ä inde eşquarlarğa irekle xezmät öçen şartlar tudırılu mäsäläsen alsañ, bu yaqtan da Başqortstan xakimiätläre bik maqtana almıy. Küp eşquarlar üzlärenä bulğan basım arqasında da, törle oyışmalarda utırğan waq türälärneñ alarnıñ eşlärenä qısıluı säbäple dä Başqortstannıñ keçe biznes öçen bik uñaysız töbäk dip isäpli. Milli mäs'älälär dä zur ğına rol'ne uynıy migratsiä xällärendä. Başqortstanda töp millät sanalğan başqortlarğa här cirdä östenlek birelüe dä xalıqnıñ çitkä kitüenä säbäpçeder. Änä bit Rafael' Baydäülätov ta “balıq tiränräk cirne, ä keşe uñaylıraq urınnı ezli” dip tanıy.

XS
SM
MD
LG