Accessibility links

Кайнар хәбәр

Qazanda ärmän rässamınıñ kürgäzmäse açıldı


Mişa Grigoryan tumışı belän Ärmänstannan bulsa da, tormışınıñ küp öleşe Çuwaşiädä ütä. Ul Mäskäwdä, Çaboksarda uzğan barlıq diärlek kürgäzmälärdä dä qatnaşıp kilä. 2000 yılda Şveytsariäneñ Syurix şähärendä Grigoryannıñ räsemnärennän torğan kürgäzmä oyıştırılğan bulğan. Pänceşämbedä Qazannıñ “ArtEko” sänğat galereyasendä açılğan kürgäzmä dä anıñ räsemnärennän tordı.

Qazanğa kilgän räsemnärdän çın yaz ise kilä, di sänğät belgeçläre. Alarda bersennän-berse güzäl çäçäklär, törle üsemleklär töşerelgän. Mondıy räsemnärne Mişa yuqqa ğına saylamağan. Ul bu kürgäzmäne barlıq xatın-qızlarğa da yazğı büläge itep äzerlägän ikän. Çarağa Tatarstan häm Çuwaşiäneñ mädäniät ministrlığı wäkilläre kilgän ide. Kürgäzmäne oyıştıruçılarnıñ berse bulğan Tatarstan ärmännäreneñ milli-mädäni moxtariäte räise Mixail Xaçatryan ike ara kileşü çarası bu dide:

Tatarstanda ärmännär mädäniäte könnäre häm Qazan - Yırewan kileşüen imzalaw qısalarında bez berniçä çara uzdırdıq. Zur ğına konsert, ärmän rässamınıñ kürgäzmäse. Häm tağın berniçä çaranı planlaştırabız. Mişa Grigoryan ul däräcäle rässam. Kürgäzmä açılışında Çuwaşiä ministrlığı wäkilläreneñ qatnaşuı da şunı kürsätä. Bezgä oyat tügel, kiresençä, bik ğorurlanabız.

Mişa Grigoryan böten dönyağa taralıp yäşäwçe, üz milläten, däwläten onıtmawçı ärmän xalqınıñ wäkile. Bagration kebek ğaskärbaşı, kompozitor Aram Xaçaturyan, ğalim Ambarsumyan, cırçı Şarl' Aznawurlar belän danlıqlı bu xalıqnıñ Tatarstanda 7 meñgä yaqın wäkile yäşi. Alarnıñ kübese Qazanda tora. Alarnıñ Qazan tormışı öçen dä tä'sire bar. Çönki küp xalıqlarnıñ ikençe tuğan yortı bulğan Tatarstanda alar üzlären irken xis itä. Rusiäneñ rässamnar berlege äğzäse bulğan Mişa Grigoryan da monı raslıy:

Tatarstanda ärmännärneñ üzlären yaxşı xis itüe, uñışlı itep eşläwe alarnıñ üzlärennän genä tormıy. Bu bigräk tä mondağı xalıqara mönäsäbätlärgä, Tatarstannıñ niçek qabul itüenä bäyle. Min Qazanda berniçä taqır bulğanım bar. Häm şunı äytä alam - respublikada icadi yaqtan üsü öçen dä böten mömkinleklär tudırılğan. Qısqası, ärmännär monda üzlären bik yaxşı xis itä. Çönki tatar xalqı häm ärmännär üzläre dä bik qunaqçıl xalıqlar.

Rusiäneñ rässamnar berlege äğzäse Mişa Grigoryannıñ kürgäzmäse ArtEko sänğät galereyasında 20 kön däwam itäçäk. Häm avtor anıñ räsemnären respublikadağı ärmännär genä tügel, ä başqa millät wäkilläre dä qızıqsınıp qarar digän ömettä qala.

Al'bina Zäynulla

XS
SM
MD
LG