Bötendönya Başqort qorıltayı Başqarma komitetı Başqortstannan çittä yäşäwçe başqortlarnıñ milli-mädäni mänfägat'lären yaqlaw täñgälendä soñğı waqıtlarda bik çämle eş başladı. Rumil Aznabaev citäkçelek itkän bu oyışma üzeneñ aktivlığın Başqortstannıñ Rus däwlätenä quşıluına 450 yıllıq yubileyğa äzerlek belän dä bäyläp añlata. “Şuşı yubileynı çit töbäklärdä yäşäwçe başqortlar belän bäyläneşlärne nığıtuğa, alarnıñ mänfägat'lären kiñräk yaqlawğa faydalanırğa tieşbez” - dip belderä Rumil Aznabaev.
Soñğı berniçä ayda ğına da Bötendönya Başqort qorıltayı Başqarma komitetı citäkçelege häm aktiv äğzaları Perm kraenda, Çiläbe, Tömän ölkälärendä eş säfärendä bulıp, anda küçmä utırışların ütkärde häm törle mädäni çaralar oyıştıruda qatnaştı.
Bötendönya Başqort qorıltayınıñ Mäğärif bülege ayıruça zur eş başqara soñğı waqıtta. Çit töbäklärdä yäşäwçe başqortlarnıñ üz ana tellärendä belem alularına mömkinleklärne buldıru häm başqa törle çaralar oyıştıru xaqında beleşü öçen, bez Mäğärif bülege citäkçese Gölfinä Yulamanovağa möräcäğät ittek.
Bötendönya Başqort qorıltayı Başqarma komitetı çit töbäklärdä yäşäwçe başqortlarnıñ milli-mädäni, mäğärif ixtıacların qänäğätländerü öçen bar mömkinleklärne öyränä. Bu cähättän tatarlar belän başqortlar tuplanıp yäşägän ölkälärdä daimi wäkilleklär buldıru, Başqort qorıltayınıñ büleklären oyıştıru da näticäle eşçänlekkä yul aça. Gölfinä Yulamanova äytüençä, çit töbäklärdä açılğan andıy büleklär şundağı xakimiätlär belän añlaşıp eşlärgä, tığız xezmättäşlektä bulırğa tieş. “Bötendönya Başqort qorıltayınıñ bülekläre ayıruça Sarıtaw, Irımbur, Çiläbe, Tömän ölkälärendä yoğıntılı eşli. Bigräk tä bu yunäleştä Çiläbe ölkäsendäge bülek wäkilläreneñ eşçänlege başqalarğa ürnäk bulıp tora”, - di Gölfinä Yulamanova.
