Accessibility links

İjawda Tuqaynıñ "Şüräle"senä 100 yıl tuluın zurlap ütkärälär


Ğabdulla Tuqaynıñ «Şürele» äsären uqımağan, belmägän keşe siräkter. Ä menä ul äsärgä inde 100 yıl tuluın äle sanawlı ğına keşe beläder. Udmurtiä başqalası İjaw şähärendä eşläp kilüçe Musa Cälil kitapxanäse xezmätkärläreneñ älege tügäräk datanı zurlap bilgeläp ütärgä niätläre. Älege data uñayınnan, Tuqaynıñ äsärlären tağın ber qat uqıp, Şüräle obrazı buyınça bäyge dä iğlan itkännär. Bu xaqta kitapxanäneñ uqu zalı xezmätkäre Rämziä Ğizzatullina söyläde.

Rämziä Ğizzatullina süzlärençä, kitapxanägä inde balalar baqçalarınnan malaylar-qızlar, mäktäp uquçıları üzläreneñ eşlären dä kitergännär. Alar arasında inşalar, Şürälene surätlägän räsemnär bik küp. Ğabdulla Tuqaynıñ tuğan könenä - 26 aprel'dä bäygeneñ berençe turına näticä dä yasarğa niätläp toralar.

Kitapxanägä tirä-yun'däge tatar törkemnäre bulğan balalar baqçasınnan häm tatar sıynıfları bulğan mäktäplärdän balalar küpläp yöri. 55 sanlı mäktäpneñ ikençe sıynıf uquçısı Al'bina belän aralaşıp ta aldıq.

Al'bina kebek başlanğıç sıynıflar uquçıları häm baqça balaları öçen uqu zalınnan tış uyın bülmäse dä bar. Kitaplar qarap arğaç, ul bülmägä çığıp uyınçıqlar belän uynap alu, yögereşep uzışu, aralaşu — başqa uquçılarğa qomaçawlıq itmi.

Ğomumän, bu kitapxanä İjaw şähärendä tatar ädäbiäte häm mädäniäte üzäge itep bilgelände. Elek tatar şağire Musa Cälil isemen yörtsä dä kitapxanä, tatar kitapları belän bay dip äytep bulmıy ide. Ütkän yılda optimizatsiä qısalarında anı Puşkin isemendäge kitapxanä belän berläştergäç, ä annan tatar xezmätkärläre häm tatar kitapları, matbuğat basmaları biregä küçerelde, bu üz çiratında, eşne kiñäytep cibärergä etärgeç birgän. Bu xaqta kitapxanä mödire Rämizä Qamalieva söyläde.

Biredä ağımdağı yılda ğına törle tatar kiçäläre, oçraşular uzğan. Kitapxanä milli säyäsät ministırlığı iğlan itkän bäygedä qatnaşıp, premiägä layıq bulğan. Qazannan tatar kitapları alıp qaytqannar, häm komp'yuter satıp alğannar, dip dävam itte Rämizä Qamalieva.

Tatar telendä kitaplar sorap millättäşlärebez şähärneñ törle töbäklärennän kilälär ikän. Ayıruça tarixi romannar, tatar xalqınıñ ütkäne buyınça dokumental' äsärlär, milli tärbiä birü turındağı kitaplarnı sorap möräcäğät itälär ikän.

XS
SM
MD
LG