Sişämbegä qarşı töndä 68 yäşendä tanılğan yazuçı, şağir Roman Solnsev wafat buldı. Roman Solnsev iseme belän tanılsa da, tatar xalqı öçen ul Rinat ide. Çönki anıñ tulı iseme - Sufiev Rinat Xaris ulı. Yazuçınıñ tuğan yağı Tatarstannıñ Minzälä rayonı. Ul Qazan universitetınıñ fizik fakul'tetın tämamlasa da, üz yazmışın ädäbiätkä bağışlıy. Rinat Sufiewnıñ yaqın dustı, ataqlı şağir, “Qazan utları” jurnalı baş möxärrire Rawil Fäyzullin yazuçını bolay dip iskä aldı:
Rinat minem yaqın dustım ide. Mondıy xäbärne işetü minem öçen bik awır buldı. Rinat belän bez Qazan universitetında ber waqıtta uqıdıq. Ul näq şul yıllarda ädäbiätkä, şiğriätkä tartıla. Rusça icat itkäç, Konstantin Simonov aña yañğıraşlı - Roman Solnsev isemen alırğa täqdim itä. Häm küräsez Rinatqa bu isem oşap kitä. Ämma isemdä genä tügel bit eş. Rinat canı belän tatar ide. Anıñ äsärlärendä dä üz millätenä xörmäte çağılğan. Bigräk tä soñğı distä yılda ul üz millätenä tağı da yaqınaya.Milli canlı Rinat Sufiev rusça icat itte. Ul ike distä kitap avtorı. Anıñ “Vostorjennıy begles - Şat qaçaq”, “Ta osen - Şul köz, “Dvajdı po odnomu sledu” kebek äsärläre kiñ uquçılarğa mäğlüm. Anıñ äsärlärenä spektakl'lär Mäskäwdä, Sankt-Piterburgta, Krasnoyarskida quyıldı, fil'mnar töşerelde. “Zapomnite menya takoy” fil'mı öçen yazuçı 1993 yılda Strasburg şähärendä gran-priğa layıq buldı.
Rinat Sufiev ozaq yıllar däwamında Krasnoyarskiyda yäşäde. Andağı zur yazuçı Viktor Astaf'yevnıñ yaqın dustı häm fikerdäşe buldı. Qazan belän dä Rinat Sufiev aralarnı özmi. Tatarstan yazuçıları arasında anıñ fikerdäşläre, dusları şaqtıy bulğan. Soñğı könnärgä qädär ul Krasnodarskiyda yazuçılar berlegen citäkli, “Den i noç'” ädäbi jurnalınıñ baş möxärrire bula.
“Den i noç'” ul qalın jurnal, yılğa dürt tapqır çığa. Rinat şuşı basmada Qazan yazuçılarınıñ da äsärlären bastıra, dönyağa kürsätä.Şağir, “Qazan utları” jurnalınıñ baş möxärrire Rawil Fäyzullinnı işettegez. Roman Solnsev - Rinat Sufiewnı Krasnoyarskidağı dusları, fikerdäşläre, uquçıları pänceşämbe könne soñğı yulğa ozataçaq.
Al'bina Zäynulla
