Comğa könne Ufanıñ Qalinin rayonı mäxkämäsendä Başqortstan prezidentı Mortaza Räximovnıñ däğwäları nigezendä utırış ütte. Elegräk tä xäbär itelüençä, Räximov äfände üzenä qarata yala yağu dip bäyäläp, Rusiäneñ NTV telekanalın, andağı jurnalist Gleb P'yanıyxnı, şulay uq ul äzerlägän tapşıruda qatnaşqan tatar milli xäräkäte citäkçese Ramil Bignovnı häm Başqortstan Däwlät Cıyılışı deputatı Genadi Şabayıvnı mäxkämägä birgän ide.
İskä töşerep şunı äytik, NTV telekanalı üzeneñ bıyılğı 27 ğinwardağı “Maksimum” isemle tapşıruında Başqortstannıñ elekke senatorı İğor İzmest'yevnı qulğa alu turında mäğlümatlar birgän ide. Programmada Ramil Bignov häm Gennadi Şabaev belän äñgämälär dä buldı. Alar İğor İzmest'yevnıñ üz biznesın Başqortstan Prezidentınıñ ulı Ural Räximov belän bergä alıp barğanlığı, ğomumän, alarnıñ dus bulğanlığı xaqında söyläde. Menä şuşı xäl Mortaza Räximovqa oşamağan. Ul üz ğailäseneñ İğor İzmest'yev belän bäyläneştä buluın yalğan dip äytkän häm üzeneñ namusın häm ğorurlığın yaqlaw öçen mäxkämägä möräcäğät itkän.
Bügenge mäxkämä utırışına, Mortaza Räximov üze kilmäde. Anıñ öçen prezident apparatı xezmätkäre Xälil Timerşin cibärelgän bulıp çıqtı. NTV telekanalı da üz wäkilen cibärmägän, çönki alar bez räsmi çaqıru almadıq dip añlatıp, barı tik faqs aşa xat qına yullağan.
Ğayıplänüçe yaqlar bügen berniçä soraw belän dä möräcäğät itte. Misal öçen, alar bu mäxkämä eşen tikşerüne NTV kanalınıñ eş urını bulğan Mäskäw şähärenä cibärüne sorıy. Ufada tikşerüneñ ğädel bulmayaçağın, xakimiätlär tarafınnan basım yasalaçağın äytä alar. Şuña östäp, Ramil Bignov ta üzeneñ taläben citkerde. Ul Ural Räximov qaramağındağı “Başkirski kapital” şirkäteneñ aksiäläre tapşırılğan 4 xäyriäçelek şirkäteneñ oyıştıru dokumentların soratıp aldırunı taläp itä. Mäğlüm buluınça, “Başkirski kapital”nıñ barlıq aksiäläre öç yıl elek 4 xäyriäçelek şirkätenä tapşırılğan ide. Bu ğämälne şul çaqta uq bäysez iqtisatçılar Ural Räximovnıñ däwlät mölkätlären yäşerergä mataşuı dip bäyäläde.
Qalinin rayonınıñ bügenge mäxkämä utırışında kiläse utırışnı 24 mayğa bilgelädelär.
