Rusiä prezidentı Vladimir Putinnıñ atnakiç könne yañğıratqan yıllıq yullaması Başqortstan cämäğätçelegeneñ dä iğtibar üzägendä qala. Respublikanıñ räsmi mäğlümat çaraları comğa könne bu yullamağa törle şäxeslärneñ fikerlären birä dä başladı inde. Ğomumän alğanda, uñay fikerlär birelä matbuğatta. Här keşe bu yullamada üzeneñ xezmät dairäsenä qağılışlı äytelgän fikerlärne üz küñelenä yaqın ala, bilgele.
Başqortstannıñ Zäki Välidi isemendäge Milli kitapxanäse filialı direktorı Roza Bukanova da menä üz ölkäsenä qarağan başlanğıçlarnı xuplawın äytä.
“Bezneñ kitapxanäçelär moña qädär iñ az xezmät xaqın ala. Finanslar tözeleş öçen dä az bülenä kilde, - di Roza xanım. - Menä Vladimir Putinnıñ çığışınnan soñ bälki yaxşı yaqqa üzgärer dip ömetlänäbez. Kitapxanälärneñ eçendägese tışındağı eçtälegenä turı kilsen ide”.
