Başqortstan tatar milli oyışmaları citäkçeläre comğa könne üzläreneñ utırışına cıyıldı. Anda kiläse atna azağında, 11 mayda Ufada ütäçäk zur kiñäşmägä äzerlek mäsäläläre tikşerelde.
11 mayda Ufada respublikadağı barlıq tatar milli oyışmaları citäkçeläre häm aktiv äğzaları alda torğan eşçänlek turında fiker alışu öçen cıyılaçaq. Anda süzneñ, nigezdä, Başqortstan töbäklärendä tatar milli oyışmaları eşçänlegen näticäleräk itü turında baraçağı äytelde.
Başqortstan Tatar milli-mädäni moxtariäte räise urınbasarı, professor Mäcit Xucin süzlärençä, ayıruça rayonnarda häm şähärlärdä tatar milli-mädäni moxtariätläre büleklären oyıştıru, moñarçı tözelgännäreneñ eşen canlandıru mäsäläläre qaralaçaq bu kiñäşmädä. Mäcit äfände süzlärençä, Başqortstanda soñğı waqıtlarda başqort milli oyışmaları üz eşlären bik därräw alıp bara başladı. “Bigräk tä alar tatar rayonnarında üz eşlären aktivlaştırdı, - di M. Xucin. – Şuşı şartlarda tatar milli oyışmaları kiresençä, yoqı xälendä. Menä şuşı citeşsezlekne beterü yulları kiläse atnada Ufada tikşereläçäk tä inde”.
