Accessibility links

Кайнар хәбәр

Tatarstanda çit il maşinaları küpläp citeştereläçäk


Şuşı könnärdä Tatarstan premyer ministrı Röstäm Miñnexanov, Germaniäneñ Krauss Maffei häm Berstorff şirkäteneñ citäkçeläre belän oçraşıp konferensiä ütkärde. Biredä kütärelgän töp sorawlarnıñ berse, respublikada maşina tözeleş ölkäsen üsterü ide. Utırış barışında premyer-ministr, Tatarstanda 2010 yılğa “Qamaz” şirkäte yılğa 80 meñ, Alabuğadağı “Severstal' avto” yılına 200 meñ çit il maşinası çığaraçaq dide.

Soñğı distä yılda, Alabuğada, çit il maşinaların küpläp çığarırğa tırışıp qarawçılar şaqtıy buldı. Läkin härwaqıt berär säbäbe çığıp, bu eş uñışlı däwam itä almadı. Bügenge köndä “Severstal' avto” şirkätendä, Qıtay maşinası San Yeng, İtaliä maşinası Fiat çığarıla.

Rusiä maşina sänäğätenä küz salsaq, anda bügen, zur üzgäreşlär bara. Bu ölkädäge belgeçlär äytüençä, 2007-2010 yıllarğa bügenge köndä tanılğan barlıq çit il maşinaları da Rusiädä çığarılaçaq. Älegä bu ğämäl proyekt räweşendä qaralğan. Anıñ nigezendä Ford, Toyota, Sudzuki, Nissan, maşinaları Sankt-Peterburgta, Reno Mäskäwdä, Şkoda, Fol'ksvagen Qaluğaça. BMV, Xammer, KİA, ÇERİ Kaliningradta cıyılaçaq.. Dönya küläm tanılğan maşinalarnı şulay uq Tatarstanda da cıyarğa niätlilär. Proyekttan kürengänçä Çallıda San Yong belän Fiat, Alabuğada Fransiäneñ Sitroyän belän Pyujo, Yaponiäneñ Mitsubisi, Qıtaynıñ Gred Wall maşinaların çığaraçaqlar.

Belgeçlär fikerençä, çit il maşinaların bezdä cıyu, alarnıñ bäyälären 2-3 meñ dollarğa kimetäçäk. İnde bügen dä, “WAZ” şirkätenä köndäşlek bulğan, arzanlı maşinalar şaqtıy. Tatarstan maşina bazarına küpläp arzan çit il maşinası kilä başlaw belän, xalıq tämam WAZ maşinalarınnan baş tartmasmı?

Älegä Tatarstan xalqı Qıtay maşinalarınıñ sıyfatı bik yaxşı bulmaw säbäple genä, alarğa şiklänep qarıy. Läkin belgeçlär fikerençä, Qıtaylılar 5-7 yılda üz maşinaların sıyfatın ber mä ber arttıraçaqlar. Şul räweşle maşina bazarında köndäşlek tağında artaçaq. Monı belä torıp, “Avto WAZ” maşina tözeleşendäge törle şirkätlär belän kileşülär tözi. Şundıylarnıñ berse maşina cihazların citeşterüçe Magna kompaniäse. Älege şirkät belän bergä “WAZ” 2009 yılğa yaña maşina çığarırğa cıyına. Sıyfatı yağınnan älege maşina çit ilnekelärdän qalışmayaçaq dip belderä, şirkät belgeçläre.

Ğädel Galämetdinov.

XS
SM
MD
LG