Accessibility links

Кайнар хәбәр

Omskida veterannarnı xörmätläw telägänçä buldımı


Rusiäneñ başqa töbäklärendä kebek Omski yağında da Ciñüneñ 62 yıllığı bixisap çaralar belän kiñ külämdä bilgelänep ütte. Bäyräm tantanaları 9 mayğa çaqlı küpkä aldan başlanıp itkän ide häm äle dä däwam itä. Uzğan yäkşämbe könne tatar milli-mädäni möxtäriäte suğış häm tıl veterannarı öçen oçraşu-kiçä ütkärde. Möxtäriät äğzaları älege oçraşunı ütkärergä küptän äzerlängännär ide, ämma qayber säbäplär arqasında çara berazğa kiçekterelde. Möxtäriät räise Ğafiä Aleeva, kiçäne irtäräk ütkärergä telägän idek, ämma üzebez urnaşqan mädäniät yortında röxsät itmädelär, üz tatarlarığız ösen nigä ayırım kiçä eşlisez dip äyttelär,- di.

Şulay da, Ğafiä xanım süzlärençä, ansambl' urnaşqan “Krasnaya Gvardiä” mädäniät sarayı citäkçelegeneñ urınnı birmäwe, tatarlarnı yaratmağanlıqtan yäisä veterannarnı xörmät itmägänlektän tügel, ä bazar mönäsäbätläre näticäsendä. Çönki şähärneñ uñaylı urınında urnaşqan mädäniät sarayınıñ tamaşaçı zalı da, bülmäläre dä arendağa – tüläwle çaralar ütkärüçelärgä daimi tapşırılıp tora. Bazar “çıbırqılap” torğanda alar, yäğni citäkçelär, aqçadan başqa ber närsä turında da uylıy almıylar axrı,-di Ğafiä Aleeva.

Kiçägä çaqırılğan veterannarnıñ qayberläre ğädät buyınça başta “Qızıl Gvardiä” mädäniät sarayına barıp, şähär üzägennän şaqtıy yıraqta urnaşqan “Duslıq yortı”na qıyınlıqlar belän beraz soñğa qalıp kilep cittelär. Oçraşuğa kilgän veterannarnıñ küpçelege tıl veterannarı häm balaçaqları suğış yıllarına turı kilgän ölkännär ide. Suğış veterannarı 4 keşe buldı. 80 yäşlären tutırğan Gil'metdin abıy Siracetdinov, Sabit abıy Tuşakov, Xasib abıy Kotusov häm Gabdelbär abıy Gabdraxmanov.

Oçraşu-kiçä eşmäkär millättäşebez Rafael' Zäbirov yärdäme belän äzerlängän çäy östäle artında ütte. Kiçä barışında veterannarnı küptän tügel yalğa çıqqan ofitserlar Äsqat Quramşin häm Xaqimcan Möxämätdinov, Omski ölkäseneñ Mädäniät ministrlığı wäkile Tat'yana Şixovsova häm başqalar täbriklädelär. Äsqat äfände Quramşin täbrikläwdän tış yäşlärneñ bügenge xalätenä, tuğan telneñ yuğala baruına qarata borçıluın da belderde.

Suğış veterannarı ütkännären dä iskä töşerdelär, iğtibar citärlek, pensiäläreneñ yaxşı buluın belderdelär. Şul uq waqıtta xäzerge zamannıñ uñaysızlıqlarına da zarlandılar.

“Umırzaya” ansambleneñ ber törkem häwäskärläre isä maxsus mädäni programma äzerlägännär ide. Alar asılda suğış yıllarında cırlanğan cırlar başqardılar, äkrenläp veterannar üzläre dä cırğa quşıldılar, “Kül buyına kilsäñ ide”, “Sağınu”, “Qaz qanatı” kebek köylärgä val's äyländelär.

Bez balaçaqnı kürmi üskän buın, uyınnıñ närsä ikänen belmädek, mäktäptän soñ başaq cıya, elevatorda eşli idek, onıtılırlıq tügel, ägär suğış bulmağan bulsa küplärebezneñ yazmışı başqa bulır ide, dip, söyläde balaçağı suğış waqıtına turı kilgän Räşidä apa Bagautdinova. Räşidä apa çığışın cır belän tämamladı.

“Umırzaya” ansamble cırçısı Samat Xäyrullin, mondıy kiçälär ütkärü bik tä möhim, berdän yäşlärgä tärbiä, xäzer yuq diärlek andıy tärbiä, ikençedän veterannar öçen ul bik zur bäyräm, inde alar bik az qalıp bara,- dip äytep ütte.

XS
SM
MD
LG