Bu könnärdä, Tatarstan citäkçelege qızğan taba östendä kebek çabıp yörep, Yevropada tözekländerü häm üseş bankınıñ utırışın uzdırğan arada, Biektaw rayonında monnan da qızuraq itep, respublikanıñ “Qurşawele” sanalğan “Qazan” çañğı şuu kompleksı yandı. Tatarstanda dön'yaküläm şundıy zur waqiğalar barğanda, citäkçelek, bu yañalıqnı kiñ cämäğätçelekkä ällä ni beldertergä telämäde. Yanğın turında yazmasınnar dip, açı telle “Veçernyaya Qazan” gäcite jurnalistların xätta köç qullanıp yanğın urınnarınnan quıp cibärgännär. Ämma qarşılıqlar bulsa da,bu xäbär Tatarstan matbuğatında küpmeder däräcädä taraldı inde.
Zur bäyrämnär waqıtında, yanğın çığu oçraqları ğädäti xälgä äylänep bara kebek. Qazannıñ meñellığın iskä töşerik, 3 kön qala ul waqıtta, KGB binası yanğan ide. Bu xäbär dä ällä ni zurlap yaqtırtılmadı.
Ğädättän tış xällär ministrlığı xezmätkärläre xäbärençä, bu könnärdä çañğı bazasında, 2 meñ kvadrat metr cirdä urnaşqan 7 qatlı kunakxanä yanğan. Faciğaneñ säbäpläre turında Ğädättän tış xällär ministrlığı matbuğat üzäge xezmätkäre Svetlana Lebedewa bolay dide.
Älegä yanğın çığunıñ berniçä säbäbe tikşerelä. Bu ut belän iğtibarsız bulu, yäisä, älege binada tübä yabuçılarnıñ xataları buluı mömkin. Älbättä bolay digändä bez, kemnärder maxsus yanğın belän iğtibarsız bulğannar digän fikerne dä inqar itmibez.
Yanğın säğät 4 tä başlanğan. Kompleksnıñ rayon üzägennän yıraq bulu säbäple, yanğın sünderüçelär, tieşle urınğa soña qalıp qına kilep citä.
“Ägärdä bu xäl turında bezgä yanğın başlanğaç uq xäbär itsälär, yanğınnı sünderergä küpkä ciñelleräk bulır ide” dip belderä yanğın sünderüçelär. Östäwenä esse, cille Hawa utnı tağın da tarata. Yanğınnı sünderüdä Biektaw rayonı häm Qazannıñ Kirov rayonı yanğın sünderüçeläre qatnaşa. Kiçke altıda, yanğınğa qatlawlığı buyınça 3 däräcä birelä. Yanğın cirenä, Tatarstannıñ ğädättän tış xällär häm grajdannar oboronası ministrı wazifaların başqaruçı Yanatoliy Anikin da kilä. Biredä yanğın sünderü belän ul üze idärä itte. Barlığı bu eştä 16 avtotsisterna su, 20гә yaqın başqa texnika, qullanılğan. Yanğın sünderü barışında biredä operativ ştab tözelgän. Yanğınnan kürelgän zıyan turında Svetlana Lebedewa bolay dide.
Xäzergä yanğın urınında däwlät yanğın küzätüe xezmäte belgeçläre eşli. Yanğınnıñ säbäpläre belän, kitergän zıyanı ğädättä 3 könnän alıp 10 köngä xätle barğan tikşerülärdän soñ bilgele bula. Yanğın tulısınça kiçke 9 yartıda ğına sünderelä. Yanu däräcäse yuğarı buluğa qaramastan, faciğädä, zıyan kürüçe keşelär yuq.
Ğädel Galämetdinov
