Accessibility links

Кайнар хәбәр

Mäskäwdä televideniedäge senzurağa qarşı çara uzdı


Yäkşämbe könne Mäskäwneñ Ostantkino televidenie manarası yanında Rusiä televideniesendä matbuğar irege kimügä qarşı miting uzdı.

Demonstratsiäçelär Mäskäwneñ tönyağında cıyılıp Putin televideniese kiräkmi digän şiğarlär belän Ostankino tele häm radio tapşırular manarasına yünälde.

Kiläse atnada xalıqara jurnalistika konferensiäse ütkärergä äzerlänüçe Mäskäwdä 500-läp keşe häm alarnı ozata baruçı militsiä qatnaşındağı bu protest çarası Rusiädä matbuğat irege torışı öçen borçılularnı çağıldıra.

Bu cıyında xoquq yaqlawçılarnıñ häm säyäsätçelärneñ çığışları kübesençä däwlätneñ televideiniegä täesir ütenä qarşı buldı. Çığış yasawçılar arasında Yabloko firqäse citäkçese Grigoriy Yavlinskiy da bar ide.

"Bezne televideniedäge yalğan, televideniedäge oyatsızlıq, televideniedäge hönäri kamilsezlek, televideniedäge säyäsi senzura bik borçıy, bez monıñ belän kileşmibez, protest belderäbez. Bez monı ilebezneñ kiläçäge önen bik qurqınıçlı dip isäplibez" dide Yavlinskiy.

Yabloko, Keşe Xoquqları Xäräkäte häm Mäskäw Helsinki Törkeme oyıştırğan bu qarşılıq çarası şähär xakimiätläre tarafınnan röxsät itelgän ide häm ul tınıç qına ütte.

Bu cıyın ildäge küpçelek mäğlümät çaraları xökümätne yaqlawçığa äwerelä digän ğäyepläwlärgä kitergän waqıyğalar sürätendä ütte. Uzğan atnada Rus Xäbärlär Xezmäteneñ 8 jurnalistı xäbärlärdä xökümätne uñay itep sürätlärgä quşu belän kileşmiçä eştän kitte.

Şul xezmätneñ baş möxärrir wazıyfasınnan alınğan Mixail Baklanov keşelär professional eşläw mömkinlege bulmağanğa kürä kitte dide. 3 zur radioğa xäbärlär äzerläp toruçı Rus Xäbärlär Xezmäteneñ yañalıqları millionnarça keşegä tarala.

Uzğan atnada şulay uq yöz meñnän artıq keşene berläşterüçe Rusiä Jurnalistlar Berlege arenda şartların bozğan dip Mäskäw üzägendäge binadan kitärgä mäcbür itelde.

Rusiä Jurnalistlar Berlege 28 mayda Mäskäwdä ütäçäk Xalıqara Jurnalistlar Federatsiäseneñ Bötendönya Qorıltayın äzerläwdä aktiv qatnaşa. Qorıltaynıñ iğtibar üzägendä matbuğat irege mäsäläläre bulaçaq.
XS
SM
MD
LG