Accessibility links

Кайнар хәбәр

Ukrainadağı säyäsi krizis tınıç yul belän çişelde, taraflar sintäber axırında parlament saylawları ütkärergä kileşte


Ukrainada soñğı berniçä köndä arta barğan, häm xätta köç qullanılu mömkinlege turında borçılularğa säbäp bulğan säyäsi kierenkelek çişelgängä oxşıy. Uzğan töndä ütkän söyläşülärdän soñ ike köndäş prezident Viktor Yuşçenko belän premyer ministr Viktor Yanukoviç köç qullanılu mömkinlegenä borçılular uyatqan säyäsi kierenkelek çişelde dip belderde.

Yuşçenko belän Yanukoviç xäbärçelär aldına çıqtı häm Yuşçenko waqıtınnan elek parlament saylawların 30-nçı sintäberdä ütkärü turında kileşülären iğlan itte.

"Xäzer bez Ukraindağı säyäsi krisiz çişelde dip äytä alabız. Bik ozaq häm min äyter idem ciñel bulmağan söyläşülärdän soñ bez urtaq fikergä kildek" dide prezident.

Ul şulay uq bu atnada parlament saylawlar ütkärü öçen kiräkle qanunnı qarıyaçaq dide.

Yanukoviç bu kileşü saylawlar üktärü turındağı ğına kileşü bulmadı dide.

"Bügen bez şulay uq üzebezneñ säyäsi deklaratsiäne dä üz eçenä alğan kileşü imzaladıq. Anda bez barı tik üz wäkalätlärebez qısalarında ğına eş itäçägebezne, xökem sistemasına häm xoquq saqlaw oyışmaları eşenä tıqşınmıyaçağıbıznı, alarnıñ totrıqlı eşläwen täemin itäçägebezne belderdek" dide Yanukoviç.

Ukrainada säyäsi köräş aprel ayında Yanukoviçnıñ parlamentnı taratıp waqıtınnan elek parlament saylawları ütkärü turındağı prezident qararına qarşı çığuı belän köçäyep kitte.

Prezident Yuşçenko üzeneñ bu bäxäsle adımın Yanukoviç häm anıñ tarafdarı xakimiätne qanunsız räweştä üz qullarına alırğa mataşa dip aqlarğa tırıştı.

Yuşçenko Yanukoviç parlament äğzaların üz yağına awdarıp parlamentta konstitutsion küpçelek buldırırğı teli dide. Bu qarşılıq soñğı könnärdä tağın da köçäyep kitte. Yuşçenko Yanukoviçnıñ berektäşe bulğan baş prokuror Svyatoslav Piskunnı wazıyfasınnan aldı.

Comğa könne Yuşçenkonıñ 40 meñlek eçke ğäskärkärne üz qaramağına küçerü turındağı qararı säyäsi qarşılıq köç qullanuğa äwerelergä mömkin digän borçılularğa säbäp buldı.

Yanukoviç bu qararnı qurqınıçlı häm konstitutsiägä qarşı kilä torğan qarar dip bäyäläde. Ämma şimbä könne Yuşçenko eçke ğäskärlärne Kievqa kiterergä quştı. Şulay da alarnıñ küpçelege Kievqa kertelmäde.

Inde bu krizis ütelgännän soñ Yuşçenko Ukraina demokratiäse xäzer köçleräk dide.

"Ukraina bu krizistan Aprel ayına qädärge belän çağıştırğanda küpkä köçleräk bulıp çığa" dide Yuşçenko.

Xäzergä fiker beleşülär bu ike köndäşne yaqlawçı partiälärneñ häryaqlap 40 protsent çaması tawış cıyu mömkinlegen kürsätä.

Yewropa Şurası bügenge kileşüne xupladı häm Yuşçenko belän Yanukoviçqa qotlaw belderde.
XS
SM
MD
LG