Accessibility links

Кайнар хәбәр

Gazprom yözen üzgärtä


Gazprom dönyağa üzeneñ yaña yözen kürsätergä äzerlänä. İmidjnı yaxşırtır öçen Gazprom 3 xalıqara şirkätkä möräcäğät itte. Alarnıñ eşe – şirkätkä könbatış investisiälären cälep itüdä yardäm kürsätü häm xalıqara eşquarlıq dönyasında Gazpromğa qarata mönäsäbätne yaxşırtu bulaçaq. Bu şirkätlärneñ ikese belän Kreml dä xezmättäşlek itä. Alar Rusiä citäkçelegen Könbatış belän üz üzen niçek totarğa öyrätä. Kommersant basması yazuınça, Gazprom häm cämäğätçelek belän eşläw şirkätläre arasında tözelgän kileşüneñ bäyäse – 11 million dollar.

Xäzer Gazprom turında dönyada ni uylıylar?

Gazpromnı däwlät eçendä däwlät dip atıylar. Yeltsin çorında bu şirkät maxsus status, salım tüläwdä taşlamalar alıp qaldı. Şirkät başlığı Viktor Çernomırdin bulğanda, Gazprom – qanunnarnı tanımağan şirkät dip sanaldı, dip yaza radiobıznıñ Rusiä häm Ukraina belgeçe Roman Kupçincky. Citäkçelekkä Rem Vyaxirev kilgäç Gazprom tirän rişwätçelek cäncallarına battı.

İñ qarañğı häm qatlawlı çor 2001nçe yılda Gazprom başlığı urınına Aleksei Miller kilgäç başlandı. Miller elek elektän bulaçaq prezident Vladimir Putin häm soñınnan Kremldä yuğarı wazifalarnı alaçaq keşelär belän yaxşı tanış ide. Miller citäkçe bulu belän Gazprom Törkmänstan gazın Ukrainağa quu eşendä aradaşçı sıyfatında Budapeştta urnaşqan Eural Trans Gaz isemle şirkät qordı. Şirkätneñ yabıq häm nindi eşlär başqarılğanı bilgesez buluı säbäple basım artqaç, 2004nçe yılda ul yabılıp, baş fatirı Şveytsariädä bulğan yañası , RosUkrEnergo şirkäte açıldı.

Uzğan yılnıñ ğinwarında gazğa xaqlar mäsäläsendä kileşä almıyça Ukrainağa gaz torbaların yabu waqiğasınnan soñ Könbatış Gazpromğa bötenläy artı belän borıldı. Küplär şirkätneñ Kreml quşqanın eşläwen, monıñ säbäbe itep – Kremlneñ Ukrainada saylanğan yaña prezident Viktor Yuçenko häm anıñ Äflisün Koalisiäsenä mönäsäbäten belderü dip kürde. 2005nçe yılda Putin Ukrainada Viktor Yanukoviçqa yaqlaw beldergän ide.

Küzätüçelärne aptıraşta qaldırğan tağın ber äyber buldı. Gazprom Ukrainağa gaznı turıdan turı Törkmänstannan tügel, ä üzeneñ serle RosUkrEnergo şirkäte aşa satıp alırğa quştı.

Şulay itep Gazpromğa qarata bilgele ber mönäsäbät tudı, xäzer inde tanılğan öç şirkät anı üzgärtergä tırışaçaq. Azatlıqnıñ Rusiä häm Ukraina belgeçe Roman Kupçinsky süzlärenä qarağanda, yıllar buyına tözelgän bu imidjnı tiz genä üzgärtü bik ciñel bulmayaçaq. İñ zur problema şunda ki - Gazprom ber qayçan da üzeneñ eşçänlegen çittän tikşerergä röxsät itmäde. Gazprom eşendä cawapsız häm şikländerä torğan oçraqlar tapqan Hermitage Capital Management isemle ber şirkätneñ başlığı William Browderğa uzğan yıl Rusiä kilergä birmägännär, säbäben – bu keşe Rusiäneñ milli iminlegenä yanıy, digännär.

Ni öçen Gazprom xäzer genä yaxşı bulıp kürenergä tırışa?

Kupçinsky:

"Xäzer Gazpromnıñ imidjı Rusiä imidjına yoğıntı yasayaçaq."

Putin Rusiäneñ ğorurlığın häm köçen kire qaytarırğa tırışa. Monı ul 8 yıl prezidentlığı däwerendä demokratik xoquqlarnı çikläp, ildä häm tışında üzen täñqitläwçelärgä qarşı pıçraq alımnar qullanıp häm Rusiäneñ tabiği baylıqlarına tayanıp qaytarırğa tırışa, di Kupçinsky. İkençe möddät prezidentlığınıñ soñğı ayları qalıp barğanda, Putin Gazprom idarä häm açıqlıq mäsäläsendä Könbatış standartlarına yaqınlaşa dip kürsätergä teli, di belgeçlär. Yaña PR kampaniäse barı tik küz buylaw bulırmı, ällä çınnan da Gazpromda üzgäreşlär yasarmı, älegä ber kem dä bu sorawğa cawap birä almıy.
XS
SM
MD
LG