Accessibility links

Кайнар хәбәр

Görcestan: Saakashvili BMOda Russiägä qarşı qırıs süzlär äytte


Görcistanda wazğiät berniçä ay tınıp torğannan soñ yañadan kierenlelek başlanırğa tora. Prezident Mixeil Saakaşvilinıñ elekke yaqın tarafdarı, elek baş prokuror, eçke eşlär, saqlanu ministrı wazifaların ütägän İrakli Okruaşvili, prezidentnı xalıq arasında qotqı taratuda, yallap üterülärgä färman birüdä, tuğan-tumaçaların yuğarı wazifalarğa bilgeläwdä ğayepläde... Östäwenä Kodori tarlawığında görci köçläre Rusiäneñ ike xärbien atıp üterde, Könyaq Ossetiädä atışlar turında xäbär itelä. Ul arada prezident Saakaşvili New Yorkta BMO cıyılışına kilgän dönya citäkçeläre aldında, Rusiäneñ täñqitli, Mäskäw Görcestan eşlärenä tıqşına, pırdımsız häm zararlı adımnar yasawnı däwam itä dip söyli.

Abxaziä töbägendä, urmanda bulğan waqiyğa, bolayda araları kiyerenke bulğan ike il, Rusiä belän Görcestan arasın tağın da naçarayttı. Biredä, ütkän atna Görce köçläre ike Russiä xärbiyeñ ütergän ide. Prezident Saakaşvili, BMOda yasağan çığışında, monı çik buzuçılarğa qarşı tärtip saqlaw çaralsı buluın belderde.

“Gacäp eş, ber Russiä xärbi ofisäre Görcestan urmanına nişläp yöri? Xökümätne cimerü maqsatında ğisyançılar oyıştırıp, alarnı citäkli me ällä? Min Russiäle iptäşlärebezgä sorarğa telim, Rusiädä cir betkän me ällä? Ällä Rusiä xärbilärenä Rusiädä ülergä urman citmi dä, Görcestanğa, Görcestan urmanına kilälär? Moña, nindi añlatma bulmasıñ, bez alarnıñ ülüenä borçılu belderäbez.”

Russiä isä bu xisap belän kileşmi. Russiäneñ BMOdağı wäkile Vitali Çurkin, Saakaşvili çığışınnañ soñ, monıñ terrorçılıqqa qarşı künegü çaraları buluın söyläde. Höcüm Kodori tarlawığında künegülär barğan çaqta bulğan.

Churkin höcüm bulğan keşelärneñ, öyrätüçe buluların söyläde. Häm alarnıñ, pıçaq qadap, başlarına atıp üterelgännären belderde.

Russiä belän Görcestan arasındağı bäyläneşlär, 2003nçe yılda gölçäçäk inqilabı waqıtında, Amerika yaqlı Mixael Saakaşvilineñ xaqimiätkä kilüennäñ soñ qaqşıy başlağan ide.

Uzğan yıl, Tiflisineñ 4 Russiä xärbi xezmätkären şımçılıqta ğayepläp qulğa alğannañ soñ Russiä Görcestan belän aradağı elemtäne häm säwdä bawın bötenläy özde.

Bu yıl avgust ayında isä, Görcestan yağı, Russiä hawa köçläreneñ Görcestanğa qanunsız kerep, raketa taşlap kitüe xaqında beldergän ide. Raketa, Könyaq Osetiäğa yaqın Görcestan çigenä töşkän läkin şartlamağan ide. Rusiä tarafı isä bu waqiyğanı inqar itte.

Xalıqara häm Russiäbelgeçläre tarafınnan yasalğan qarşılıqlı 3 tikşerüdäñ soñ, Yewropa Berlege İminlek häm Xezmättäşlek oyışması bu waqıyğanıñ buluına ışanğanın läkin ğayeplärgä telämäwlären belderde.

Sonğı, Kodori Tarlawığı waqiyğası xaqında, Saakaşvili köç qullanularğa yul birmiyäçäkbez dide:

“Bez, töbäk öçen, ike taraflı kileşengän bäyläneşlärneñ - ike tarafqa da faydalı bulaçağına ışanabız. Min Görcestan xalqı qarşılıqlarnı taratuda kiräkle xezmätne kürsätkänder dip ışanam. Häm Görcestan, demokratik prinsipläre belän ozın waqıtlı totırıqlılıq häm mul tormış buldıruda açıqlıq belän idarä itü misalınıñ canlı ber ürnägeder dä.”

Läkin töbäktäge kiyerenkelek sürelmäde, çarşämbe könne Könyaq Osetiäda köçle atışu tawışları işetelde, suğışçılar belän görci yağı ikese dä berberseñ ğayeple.

Görcestan köçläre, ğisyançılarnı xöcemnären, xökümät idaräsendäge Könyaq Osetia awıllarına yünältüdä ğayeple.

Töbäk, Görcestan häm Rusiäneñ urtaq tınıçlıq köçläre tarafınnañ saqlana.
XS
SM
MD
LG