Accessibility links

Кайнар хәбәр

İranda İslam İnqilabı saqçıları tağın da qırısraq bulaçaq


İslam İnqilabı saqçıları ilneñ säyäsi citäkçelegen täñqitläwçelärgä qarşı qırısraq çaralar küreläçäk. Saqçılarnıñ maqsatı – İrannı eçke häm tışqı doşmannardan saqlaw, dide köçlär başlığı Ali Cäğfari. İslam İnqilabı saqçıları – kemnär alar häm bu belderü İranda xoquq yaqlawçılar häm ziyalılar öçen närsäne añlata ala?

Berniçä kön elek Ali Cağfari, İslam İnqilabı saqçılarnıñ iğtibarı – eçke qurqınıçlarğa yünäläçäk, dip belderde. İran İslam cömhüriäteneñ uñışların kimetergä tırışqan här oçraq ayırım tikşereläçäk häm çaralar küreläçäk, dide ul.

İslam İnqilabı saqçıları üz eçenä xärbi hawa, diñgez köçläre , cir öste ğaskärläre, alarnı öyrätüçe häm aqça tabuçı Quds köçläre, şulay uq ixtiyari räweştä cıyılğan Basic ğaskärlären ala. İrannıñ xäzerge prezidentı Mähmüd Äxmädinicad, qayber ministrlar häm parlament äğzaları İslam İnqilabı saqçılarında xezmättä bulğan. Bu köçlärne küpmeder däräcädä elita ğaskärläre dip tä äytep bula, alarnıñ sanı 150 meñnän artmıy. Bu maxsus köçlär 1979nçı yılğı İslam İnqilabınnan soñ tözelgän, anıñ İrannıñ üzendä häm tışında zur iqtisadi köçe häm qüäte bar. AQŞ Quds köçlären Ğiraq ğısyançılarına yardäm itüdä ğäyepläp kilä.

Cağfari süzlärenä qarağanda, İranğa qarşı qurqınıçlar soñğı waqıtlarda artıp kitte häm qatlawlı şäkel ala başladı, şuña da däşmi qalu inde mömkin tügel.

İslam İnqilabı saqçıları oyışqanda anıñ nigezendä torğan, xäzer Harvard Universitetında fänni tikşerülär belän şöğellängän Mohsen Sazgara, monnan soñ bu köçlärneñ xökümätne täñqitläwçelärne cazalawda role zurraq bulaçaq, dip sanıy:

"İslam İnqilabı saqçılarınıñ maqsatı ilneñ eçke eşlärenä tağın da kübräk tıqşınu, törle säyäsi, sosial häm mädäni eşçänleklärne tıyu eşenä kübräk qatnaşu."

Soñğı aylarda İranda xoquqçılar häm jurnalistlarğa basım arta bara. Alarğa qarşı ezärlekläwdän alıp qulğa alu häm cinäyätlärdä ğayepläw belderügä qadär çaralar kürelä. Qayberäwlär däwlätneñ mondıy çaraların İranğa bigräk tä AQŞtan bulğan basımğa bäyli. İran räsmiläre berniçä tapqır AQŞnı İrandağı rejimnı qaqşatu häm inqilap oyıştıru tırışlığında ğayepläde. Xatın-qızlar xoquqların yaqlawçılar häm studentlar Amerika yardämendä İranda yomşaq revolüsiä qılırğa teli, digän ğayepläwlär yañğradı.

Elek İranda studentlar xäräkäten citäklägän, xäzer AQŞta yäşäwçe Ali Afşari, Cäğfari belderüe – xäzerge xällärgä riza bulmağannarğa qarşı qırısraq çaralar küreläçägen añlata, dide:

"Xökümät ildä sosial problemalarğa rizasızlıq tuuın kürä, İranda bu kiläçäktä tağın da köçäyep kitärgä mömkin, çönki sosial, iqtisadi ölkälärdä rizasızlıq arta."

İranda inde bolay da aktivistlar daimi xökümät basımı astında yäşi. Küplär ildän kitärgä mäcbür. Qaluçılar isä, ber bersen tağın da sağraq bulırğa çaqıra.
XS
SM
MD
LG