Accessibility links

Кайнар хәбәр

Anna Politkovskaya ülemenä 1 yıl


Keşe xoquqların yaqlawçılar häm oppozisiädäge säyäsätçelär bügen Mäskäwdä Anna Politkovskayanı iskä aldı. 2 bala anası, bäysez jurnalist Anna Politkovskaya näq 1 yıl elek 7 üktäber könne atıp üterelde. Aña 48 yäş ide. Anıñ üleme öçen äle ber kem dä cäza almadı.

Anna Politkovskayanı iskä alıp Mäskäwdä yözlägän keşe qatnaşında uram cıyını uzdı. Puşkin mäydanında xalıq aldında çığış yasap, Xalıq Demokratik Berlegennän, elekke premyer-ministr Mixail Kasyanov, Politkovskaya "keşelärneñ namusın yaqlap" haläk buldı, dide.

Berläşkän Watandaşlar Frontı yulbaşçısı Garry Kasparov Politkovskaya yäşägän yort yanında çäçäklär saldı häm anda xäter taqtası açtı. Kreml yanındağı mäydanda Politkovskaya istälegenä bağışlanğan fotokürgäzmä açıldı. Ğailäse häm tuğannarı, şulay uq ul eşlägän Novaya gazeta jurnalistları Politkovskaya qaberenä barıp çäçäklär saldı.

Düşämbedän Novaya gazeta Politkovskayanıñ elekke kesä telefonı nomerın yañadan totaştırırğa cıyına. Jurnalistlar, bu nomerğa şaltratular anıñ ülemen tikşererü barışına yardäm iter dip ışana.

Tübän Novgorodta comğağa bilgelängän xäter çarası bulmıy qaldı, anda qatnaşuçılarğa terrorda ğayepläw belderelde.

Politkovskayanı üterü säbäpläre äle iğlan itelmäsä dä, küplär anıñ ülemeneñ alıp barğan tikşerülärenä bäyle bulğanında şiklänmi. Yallanğan beräw jurnalist xanımnı anıñ Kremlgä qarşı äytkän süzläre, räsmilärneñ Çeçnädä alıp barğan säyäsäten täñqitläwe öçen ütergän dip farazlana.

Üktäberneñ dürtendä, Azatlıq radiosında uzğan konferensiädä, Novaya Gazeta möxarrire Dmitriy Moratov, Politkovskaya ülemendä Rusiäneñ küzläw xezmätlären ğayepläde:

"Anıñ öçen ğadellektän dä yuğarı köç yuq ide. Doşmannarnı ul saylap doşman itmi ide. Qurıqsınnar menä xäzer. Rusiä iminlek xezmäteneñ korrupsiägä batqan ofiserları prokuratura häm Novaya gazeta alıp barğan tikşerügä ayaq çalırğa tırışa. Min sezgä şunı äytä alam, Annanı üterüdä maxsus xezmätlär häm eçke eşlär ministrlığı räsmiläre qatnaştı."

Bu könnärdä mäsälägä xalıqara cämäğätçelek iğtibarı da arttı. New Yorkta urnaşqan Jurnalistlarnı Yaqlaw Komitetı Putinğa 4nçe üktäber könne xat yulladı. Anda Politkovskaya ülemen räsmi tikşerügä şik belderelgän häm "centekle, açıq häm bäysez" tikşerü ütkärergä çaqırıla.

Bügen Strasbrugta Yevropa Şurasınıñ parlamentar assambleyası başlığı Rene van der Linden, Politkovskayanı üterüne – "demokratiägä turıdan turı höcüm" dip atadı häm bu cäzasız qalırğa tieş tügel dide.

Londonda çığuçı Times gazetında dönyada tanılğan 60qa yaqın sänğatkär, cırçı häm keşe xoquqların yaqlawçılar imzalağan xat dönya kürde. Anda da Politkovskayanı üterüçelärne tabu taläp itelä.
XS
SM
MD
LG