Accessibility links

Кайнар хәбәр

Argentina prezidentı xakimiätne saylawlarda ciñgän xatınına tapşıraçaq


Argentinanıñ berençe xanımı Cristina Fernandez de Kirchner ildä ütkän prezident saylawlarında ciñü iğlan itte. Dikäberdä ul xakimiätne ire qulınnan üzenä alır dip kötelä. Irle-xatınlı Kirchnerlarnı inde Könyaq Amerika Klintonnarı dip tä atıylar.

Uzğan yäkşämbedä ütkän prezident saylawları näticäläre raslansa Cristina Fernandez de Kirchner ilneñ demokratik räweştä saylanğan berençe xatın-qız prezidentı bulaçaq. Ämma anıñ xakimiätkä kilüendä ire, xäzerge preziden Nestor Kirchnernıñ öleşe şaqtıy zur.

Şuña küräder dä Argentina başqalası Buenos Airesta cıyılğan üz tarafdarları aldında çığış yasap Cristina ireneñ eşen däwam itäçägen belderde.

"Barığızğa da räxmät. Şulay uq bu keşe – prezident Kirchnernı yaqlawığız öçen dä zur räxmät" dide Cristina.

Küp kenä argentinalılar Nestor Kirchnernı 2001 yılda iqtasıy upqınğa tägärägän ilne qotqaruçı dip sanıy. 2003 yılda Nestor xakimiätkä kilgändä Argentina iqtisadıy krizisqa häm burıçlarğa çumğan, ilneñ aqça berämlege peso qimmäten yuğaltqan, xalıqnıñ yartısı diärlek yäşäw minumumınnan azraq aqça ala ide.

Xäzer isä burıçlarnıñ şaqtıy öleşe tülängän, Ğömümi Citeşterü Küläme yılına 8 yarım protsenqa üsä, urta sıynıf yañadan ayaqqa basıp kilä.

Cristina Fernandez de Kirchnernıñ säyäsi yulı küpmeder däräcädä elekke AQŞ prezidentı Bill Clintonnıñ xatını Hillary Clintonnı xäterlätä. Hillary Clinton da kiläse prezident saylawlarında demokratlar namzäte bulırğa cıyına.

Nestor üzeneñ säyäsi karyerasın ällä ni tanılmağan töbäk başlığı bularaq başlap prezident däräcäsenä kütärelde. Cristina federal senator bulıp saylanıp monı säyäsi kütäreleş öçen etärgeç bularaq faydalandı.

Nestor Kirchnernıñ prezidentlıq möddäte ildäge iqtisadıy uñış belän bilgelände häm ul ikençe möddätkä dä saylana alır ide. Ämma Nestor bu yulı üze urınına xatının täqdim itte.

Näticädä Argentinanıñ torğızılğan demokratik traditsiälärenä qarşı kilüçe yaña säyäsi ğailä barlıqqa kilüe turında süzlär dä çıqtı.

Cristina Fernandez de Kirchnernıñ saylaw aldı kampaniäse başqalarnıqına oxşaş bulmadı. Ul üz köndäşläre belän debatlarda qatnaşmadı, kiñküläm mäğlümät çaralarına da bik iğtibar birmäde häm berniçä genä saylaw aldı cıyını ütkärde.

Ämma ildäge iqtisadıy xällär yaxşıra baru säbäple bu närsälär küpçelek argentinalılarnı ällä ni borçımıy.

Küzätüçelär Cristinanıñ prezident urının aluı Nestorğa ikençe möddätkä qalğanda bulırğa mömkin xatalardan qotılu häm şunıñ belän bu wazıyfanı tağın 4 yıldan uñışlı ğına kire Nestorğa qaytaru mömkinlege birä dilär.
XS
SM
MD
LG