Mintimer Şäymievneñ «Gazprom» citäkçese Aleksey Miller belän söyläşü näticäläre

Yaña yıl üzeneñ yaqınlaşıp kilüen üzäkkä ütärlek salqınnar, qar-burannar belän xäbär itä, buğay. Sinoptiklar äytüenä qarağanda, soñğı 2-3 köndä Tatarstanda aylıq yawım-töşemneñ 25 protsentı yauğan, ä cilneñ tizlege sekundına 22-25 metrğa citkän. Tabiğatneñ bu büläge turında aldan uq xäbär itelde. Şuña kürä töngä qarşı zur yullar yabılıp, şähärara avtobuslar xäräkäte tıelğan ide. Qazanda isä şähär xucalığı buran näticäsendä zıyan kürmäde, ällä ni xäwef-xätär dä yuk. Läkin qar küp bulu, uramnar tarayu säbäple, şähär eçendä maşinada, xätta cäyäyu yörü dä qıenlaştı, Qazan üzägendä ozın-ozın maşina «probka»ları barlıqqa kilde. Şähärne qardan çistartuğa kommunal' xucalıqnıñ barlıq texnikası cälep itelügä karamastan, Qazan uramnarındağı zur-zur qar öemnäre bik aqrın çistartıldı.

Çärşämbe könne Tatarstanda qar-burannar inde basılsa da, salqınnar äle haman däwam itä. Şuña kürä, ğadättägeçä, qış köne cılılıq, yağulıq mäsäläläre bigräk tä aktual'. Şul säbäptän, sişämbe könne Mäskäwdän qaytqan Tatarstan prezidentı Mintimer Şäymievne qarşı alğın jurnalistlar da berençe çiratta prezidentnıñ «Gazprom» şirkateneñ yaña citäkçese Aleksey Miller belän bulğan oçraşu turında soraştırdılar. 1995 yıldan birle Tatarstanda ğaz qullanuı artıp kilä. Kiläse yılda bu yağulıq cibärelüe niçek bulır, xäzerge qırıs waqıtta respubliqa cibärelä torğan ğaznıñ küläme kimemäsme? Şäymievneñ Aleksey Miller belän bulğan oçraşuında näq menä şuşı sorawlar qaralğandı da inde. Bu söyläşüdä şulay uq Tatarstannıñ prem'yer-ministrı Röstäm Miñnixanov, vitse-prem'yer Sergey Kogogin da qatnaşqannar.

Mintimer Şäymievneñ süzlärenä qarağanda, oçraşunıñ näticäläre ömetle. «Gazprom» citäkçelege Tatarstannı üzeneñ iñ zur häm ışanıçlı partnerlarınıñ berse dip sanıy, çönki respubliqa ğaz öçen tüläwlärne uz waqıtında başqara, Gazprom aldında bulğan burıçlarnı da daimi räweştä qaplap kilä. Şuña kürä, 2002 yılda Tatarstanğa cibäreläçäk ğaznıñ küläme 2001 yılğa qarağanda xätta artığraq bulaçaq häm 15-15,5 millard kubometr täşkil itäçäk. Şulay uq, oçraşu waqıtında «Gazprom» şirkateneñ Tatarstan belän başqa ölkälärdäge xezmättäşlek yulları dä tikşerelgän.