Tatarstan Däwlät Şurasınıñ Rusiä Federatsiä Şurasında bulaçaq wäkileneñ iseme ataldı

Tatarstan Däwlät Şurasınıñ 10 plenar sessiäseneñ däwamı 17 ğinwarğa bilgelände. Anıñ kön tärtibendä 26 mäsälä. Berençese -- Däwlät Şurasınıñ Federatsiä Şurasındağı wäkilen saylaw. Düşämbedä Färit Möxämmätşin älege wäkil itep, Däwlät Şurası räise urınbasarı İrina Laroçkina namzäten atadı. Çığışı Älmät yağınnan, geologiä fännäre doktorı İrina Laroçkina, Däwlät Şurası räise urınbasarı bulıp 1,5 yıl eşli. Parlament jurnalistları anıñ älläni işetelerlek, telgä alınırlıq başlanğıçlar, yañarışlar belän çıqqanın küzätmädelär. Färit Möxämmätşin İrina Laroçkina kandidaturasına tuqtalu säbäplären sanağanda, ähämiätlese itep, anıñ Tatarstannıñ xatın-qızlar häm rus telle xalıq öleşe mänfäğätlären çağıldıruın atadı. Färit Möxämmätşinnıñ interviusınnan ber sitat: «...şunıñ belän bez üzebezneñ sentrist pozitsiäbezne yañadan çağıldırabız. Rusiä parlamentında ul bezneñ respublika isemennän layıqlı eşlär, anıñ grajdannarı mänfäğätlären yaqlar, dip uylıym.»